Back to Top
Responsive image
E korant di pueblo

Empleadonan na SDKK kende ta traha dirèkt ku prezunan ta rabiá


February 23, 2021 • 2 minüt pa lesa

Urny Floran: “nan tei wak den e asuntu kiko ta pasando”.

Koraalspecht–  Wardadónan di prezu i empleadonan trahando dirèkt ku klientenan na Sentro di Detenshon i Korekshon Kòrsou ta hopi rabiá i malkontentu.  Pa motibu di Covid, tin empleadonan ta traha 2 òf 3 biaha so pa siman miéntras esnan ku ta den “huisdienst”, esta traha dirèkt ku prezunan si mester traha normal.

E situashon a kuminsá lanta un situashon poko tenso den e instituto. Vigilante a papia ayera ku direktor Urny Floran kende a splika di tei wak den e situashon pa bini bek riba dje ku un deklarashon. Algun empleado mal kontentu a splika Vigilante ayera esnan kende no ta trahando regular, ta kla pa traha durante orarionan di “overtime” si, pa gana mas tantu sèn. Esaki ta lanta un situashon inhustu bou di esnan dirèkt den labor ku e prezunan kende si mester traha nan skema normal i demas empleadonan ta traha ménos i tòg gana nan salario kompleto plùs èkstra na momentu nan subi riba “overtime”.

Nan ta pensa ku situashon ta kontra di reglanan di un bon maneho i ta sinti un konflikto ta serka. Ademas, nan ta pensa tambe awor ku gobièrnu ta den problema ku likides no ta bon lokual ta tumando lugá den prizon na Koraalspecht. Hopi empleado na SDKK ta drai riba “overtime”. Apesar di e situashon tenso, mayoria empleado na SDKK kier kobra “overtime”. Anke ta trata di Covid i ta suplika koperashon, tòg tin un grupo di empleado ta hasi nan esfuerso solamente durante overtime pa nan gana mas sèn, anto sin ta traha durante nan oranan normal, debí na Covid. Pues e “overtime” ta forma un parti struktural di nan salario. Na e momentonan aki tin un problema mas ta vislumbrando den un otro grupo ku a pèrdè sèn despues di a kita parti di nan salario durante wèlga. Manera ta konosí a kita 6 dia di trabou pa motibu di wèlga i ta menasando na kita mas dia. Ya kaba tabatin dos rònt sin pago miéntras no traha, pasobra un grupo di empleado siendo nan ta na mesa ku minister di hustisia a opta pa wèlga tòg.

Debí na Covid tin empleadonan durante siman ta trahando 2 òf 3 dia., pero durante wikènt si ta bin yena nan dianan bek ku overtime trahando 3 dia kompleto. Segun e grupo rabiá no tin un kòntròl riba esaki i maneho no ta tumando medida. Manera menshoná, direktor Floran den un reakshon a bisa ku nan ta bai investigá e situashon pa averiguá kiko ta pasando. Finalmente, nan menshoná  ku tin miembro den grupo di servisio na ABVI ku ta hasiendo uzo di e “privilegio”.

Login