Back to Top
Responsive image
E korant di pueblo

Ennia lo vigilá si grupo Ansary mal uza dokumentonan entregá


February 17, 2021 • 2 minüt pa lesa

Sabine Altena

Nieuwe Haven—Djaluna próksimo, kaso Ennia ta bèk den filanan di korte, unda lo sigui evaluá e proseso di dokumentashon despues ku korte riba 18 di yanüari último a duna un veredikto. Den e veredikto, korte a ordená Ennia pa entrega grupo Ansary e dokumentashonnan nesesario.

Ralph Palm, Abdallah Andraous, Nina Ansary, Hushang Ansary i Parman International durante e komparashon di partidonan den korte tabata súplika mas dokumentashon . E demandantenan a enfatisá ku Ennia mester duna nan akseso na mas dokumentashon i korte a duna nan rason. Pero, Ennia a bisa tambe ku nan ke pa Ennia atendé e dokumentashonnan ku koutela i sekresia.

Ennia i Banko Sentral, no tabata dispuesto na entrega grupo Ansary huntu ku Ralph Palm i Abdallah Andraous nan dokumentashon sin mas. Mediante nan abogadonan Sabine Altena, Ennia a splika korte ku nan ta dispuesto na entrega mas dokumentashon, pero fo’i prinsipio a splika ku tin un preis mará na esaki. Pa por protehá privasidat di nan klientenan i mal uzo di e informashon, Ennia ke imponé un multa di 50 mil dòler estado unidense pa kada infrakshon grupo Ansary kometé ku e dokumentashonnan risibí. Ta trata di informashon for di 2006 te ku 2018, kual Ennia i Banko Sentral a entrega na korte den nan petishon sivil. Ennia a splika ku ta trata di sigur 1900 file digital i 250 kaha di dokumentashon ku mester pasa aden sin wak e kantidat di míles di e mail ku a tuma lugá entre e 6 personanan pa kende nan ta prosesando en kontra.

Abogado Murray i Doekhi kendenan ta defendé Famia Ansary, Palm, Parman International di Andraous a bisa ku e suma ta ridíkulo pasobra algun di nan klientenan no tin e sèn pa pag’é, miéntras tantu segun Murray, ya kaba dokumentonan importante den e kaso a lèk den prensa kaba. Segun Murray, nan no por kore riesgo pa aseptá e eksigensha di Ennia i Banko Sentral i despues ta resultá ku dokumentonan ku nan a pidi ta lèk.

Login