ARUBA——–Minister Maduro di Finansa a tene un konferensiá di prensa djamars mainta huntu ku Minister Presidènt y ehekutivonan di Departamento di Impuesto pa informá riba un kambio fiskal den kual ta baha e promé tarifa di impuesto riba entrada, di 10% pa 0%. E kambio aki ta trese kuné ku tur persona ku tin un entrada bou di 64.930 florin pa aña no mester paga impuesto riba e entrada aki.
Den aña 2024 e promé tarifa vigente pa kategoria di entrada te ku 34.930 pa aña tabata 10%. Den aña 2025 e tarifa aki ta bira 0%. Esaki kiermen ku di un entrada, e suma liber di impuesto kual ta 30.000 florin plùs e promé kategoria di entrada kual ta 34.930, ta keda liber di impuesto. huntu ta un suma di 64.930 riba kual no mester paga impuesto riba entrada.