Willemstad— Ayera mainta trempan e tim di aresto riba petishon di e reshèrshinan ku ta investigá ladronisia di outo a drenta den un kas na De Savaan pa asina por a detené un sospechoso.

Kontinuando ku un investigashon den un kaso di ladronisia di outo kometé den luna di yanüari último, polis a detené un sospechoso. Djamars 1 di yüni 2021 alrededor di 05.30 or, tim di aresto konhuntamente ku e tim di joyriding a detené e hòmber sospechoso M.I.A. nasé na Sürnam di 32 aña di edat, pa e kaso ariba menshoná. E detenshon a tuma lugá na Kaya Renbak. Seguidamente e agentenan a tene un entrada hudisial na e adrès menshoná, kaminda a konfiská algun artíkulo ku ta di importansia pa e investigashon. A bai ku un outo ku a bin topa kuné den e kura, tambe a bai ku un quad kual tabata kompletamente desmantela i tambe a konfiská un pikòp pa mas investigashon.  A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.