Gasolin lo baha ku 23.5 sèn i Diesel ta subi ku 5 sèn.

Willemstad- Ayera Gobièrnu di Kòrsou a publiká ku entrante 1 di novèmber e preis di gasolin lo baha ku 23.5 sèn. Esaki lo hasi e preis di gasolin 2.35 pa liter. Huntu ku esaki Diesel ta subi ku 5 sèn. Preisnan di gas chikí lo keda 16 florin i gas grandi lo keda 80 florin pa bòter.

Parlamentario Zita Jesus-Leito a splika den Parlamento ayera ku durante 2022 el a mira e esfuerso ku a ser hasí dor di Minister di Finansa, Javier Silvania, pa por mitigá e gastunan di kombustibel. E ta komprondé ku esaki a kosta 27 mion pa por yuda pueblo di Kòrsou.

Den otro paisnan por tende ku tambe ta trata na yuda pueblo dor di mitigá e gastunan di awa, koriente i kuminda, segun Parlamentario Jesus-Leito. Pa e motibu aki e Parlamentario ke sa kon Minister di Finansa a tene kuenta, den e presupuesto, pa yuda e pueblo karga gastunan ku ta subi di awa, koriente i tambe komestibel, aparte di e makutu básiko.

Minister di Desaroyo Ekonómiko kende ta sr. Ruisandro Cijntje anteriormente a splika ku Gobièrnu ta konsiente ku e preis di gasolin ta karu i ku esaki ta efekto i ta perhudiká ekonomia di pais, pero ku mester pone tur akshon den balansa. E ta splika ku tambe lo mester bai wak e asuntu di márgen di ganashi di pòmpnan, pero ku esaki ta trayektonan ku ta tuma tempu. Pa loke ta asuntu di ku pueblo lo mester a paga di mas, akinan e ta bisa ku su kolega di finansa ta bezig ku e parti aki i ku esaki tambe lo por resultá finalmente den un bahada mas di e preis pa liter di gasolin na Kòrsou.