Willemstad,– For di mañan promé (1) di yüni gas, gasolin, gasoil, koriente i awa lo subi di preis kual ta pone ku pueblo apesar di e krísis ku nos ta aden, lo mester bai paga mas.

Kuminsando mañan lo mester paga dos (2) sèn mas pa kada liter di gasolin ku aktualmente ta kosta 2,23 sèn pa liter i pues lo bira entrante mañan 2,25 sèn pa liter.

E preis pa liter di diesel tambe ta subi i ta bai bira 1,77 sèn pa kada liter despues ku esaki lo ta 1,68 sèn pa liter te ku awe. Segun BTP e subi aki ta konsekuensha di e oumento di e preisnan di kompra, manera tur luna ta ser bisá.

Por tuma nota ku e lokual a bini aserka e luna aki ta silinder di gas. Pa basta tempu aki silinder di gas chikí i grandi a keda ku e mesun preis, pero awor esakinan tambe ta bai konosé un oumento.

Un gas grandi te ku awe lo kosta 70 florin miéntras ku esun chikí te ku awe lo kosta 14 florin. Esun grandi lo subi ku 10 florin i lo kosta entrante mañan 80 florin pa unu i esun chikí entrante mañan lo kosta 16 florin, pues un oumento di 2 florin. BTP ta esun ku ta kalkulá e preisnan i pa basta tempu kaba e pueblo di Kòrsou no a konosé un bahada pa loke ta preisnan di kombustibel.