Willemstad,– Durante di e relato di dia ayera promé minister demishonario señor Eugene Rhuggenaath a splika ku parti di e suavisashon nan huntu ku esnan ku a kuminsá 2 di yüni, ta ku entrante 8 di yüni toke de keda ta keda eliminá, pues Kòrsou ta habri kompletamente.

Señor Rhuggenaath a bisa ku mesora e kier probechá pa yama un danki na tur esnan ku a traha den e tim di krísis i tambe na pueblo ku a sa di komportá di tal forma ku nos por a yega asina leu di eliminá toke de keda despues di kasi un aña. E ta pidi pa paga tinu si ku esaki ta entrante djamars 8 di yüni, pues e toke de te keda te 1’or di mardugá ta sigui e dianan aki normal.

E ta gradisí tambe e mas ku 85 mil persona a skohe pa bakuna i tambe esnan ku no a bakuna pero ta protehá nan mes. E ta enfatisá pa ban sigui protehá i ban sigui kuida.