Back to Top
Vigilante banner image

Entrante luna di yüli 2021: Empresanan ku risibí NOW mester stòp di implementá e dedukshon di 20%


September 10, 2021 • 2 minüt pa lesa

WILLEMSTAD – Entrante e luna akí empresanan lo por bolbe kuminsá apliká pa e Supsidio di Salario (NOW). Gobièrnu a yega na e desishon pa kontinuá ku e supsidio bou di kondishonnan nobo, teniendo kuenta ku e situashon ekonómiko ku algun empresa i empresario ainda ta konfrontá komo konsekuensia di COVID-19. Un di e kondishonnan ku a keda adaptá ku re-introdukshon di e Supsidio di Salario, ta e eksigensia pa empleadonan entregá 20% di nan suèldu. Lokual ta nifiká ku empresanan ku risibí NOW entrante luna di yüli 2021 lo mester stòp di implementá e dedukshon akí inmediatamente. 

For di mei 2020, empresanan ku a bin ta risibí NOW mester a yega na un palabrashon mutuo ku nan empleadonan tokante e dedukshon di 20% riba nan suèldu total bruto. Den e palabrashon akí, mutuamente lo mester a determiná si e dedukshon lo a tuma lugá den forma di redukshon temporal di salario, oranan di trabou, entrega di dianan òf sèn di vakashon òf bónùs. Durante e periodo ku un empresa tabata risibí NOW, tur su empleadonan mester a kontribuí di un òf otro forma den e dedukshon di 20% ku ta mará na e porsentahe di pèrdida di entrada di e kompania. 

Ministerio di Desaroyo Ekonómiko (MEO), Ministerio di Desaroyo Sosial, Labor i Bienestar (SOAW) i Banko di Seguro Sosial (SVB) ta risibiendo keho últimamente di diferente empleado indikando mal uso di parti di doñonan di trabou. Tin doñonan di trabou por ehèmpel ku a hasi dedukshon dòbel riba nan empleadonan i otro doñonan di trabou ku a sigui dedusí e 20% durante lunanan ku no tabatin supsidio di NOW, miéntras ku dedukshon di e 20% tabata un kondishon eksklusivamente mará na e aplikashon di NOW. Esaki pues no por a apliká mas riba empleadonan despues di luna di mei 2021. Gobièrnu ta konsiderá importante pa empleadonan ku a keda perhudiká dor di mal uso di e kondishon akí keda restituí. Den e kaso akí e restitushon mester sosodé den mesun forma ku e dedukshon a keda apliká, esta sea den forma di salario, entrega di dianan di vakashon òf otro tipo di kompensashon manera sèn di fakansi òf bónùs.

MEO, SOAW i SVB konhuntamente lo instalá un grupo di trabou pa por atendé ku e diferente kehonan di empleadonan pa ku mal uso di e retenshon di 20%. Intenshon di e grupo di trabou akí ta, pa finalmente yega na un akuerdo ku e doñonan di trabou pa solushoná e disputa ku e empleadonan en kuestion i rektifiká e fayonan ku a keda kometé. Tur empresa ku apliká i bini na remarke pa risibí NOW entrante yüli 2021, lo risibí esaki ku forsa retroaktivo pa lunanan di yüli te ku sèptèmber 2021. Ta rekomendá tur trahadó ku tin un konflikto ku nan doño di trabou riba e aplikashon di e 20% di entrega, pa aserká e grupo di trabou ku nan kaso pa medio di e-mail: [email protected].



Login