Willemstad,– Promé minister a bisa ku tur hende ta kansá den e  situashon di eskalá i desakalá medida i ku e tambe ta poko kansa di esaki, pero apesar ku por wak kiko e sifranan ta bisa nos te awe, tin remarkenan ku ta bisa ku ta trampa kier krea pa asina gobièrnu por vigilá hende.

Señor Rhuggenaath ta bisa ku apesar ku kontinuamente ta komuniká ku pueblo i ta mustra sifra, tòg ta keda insistí ku gobièrnu ta hiba un maneho pa para elekshon.

Promé minister a bisa ku number unu, “Elekshon ta sigui 19 di mart ku òf sin Covid. Gobièrnu i su pèrsona no tin ningun deseo òf motibu para elekshon.

E ta bisa ku ta bèrdat ku niun hende no ta obligá pa vakuná, sinembargo gobièrnu ta enkurashá i stimulá pa hasi uso di e oportunidat aki pa un dia nos por yega na e normal bèk, kaminda nos por hiba nos bida normal atrobe.

E ta splika ku no tin niun otro agènda ku no ta esun di protehá bida di hende na Kòrsou i ta spera ku esaki ta kla pa tur hende na Kòrsou.

“E bèrdat ta tambe ku nos úniko solushon pa nos sali for di e rutina di medida aki di eskalá i deskalá, ta si gran mayoria di nos poblashon bai vakuná”, pues promé minister Eugene Rhuggenaath.

E ta splika ku te ku awor un grupo selektá di 60 plùs i trahadónan di kuido por a vakuná. Entrante awe ta amplia e grupo ku personanan ku entre otro tin malesa króniko.  Te ku awor mas ku 8500 persona a vakuna kaba di kua algu mas ku 7400 ta riba 60 aña. A traha algu mas ku 22 mil sita, pues nos ta bayendo bon, pero nos kier bai mas mihó ainda i p’esei a bini ta aselerá i amplia posibilidat pa mas hende di nos komunidat bai vakuná. Pero señor Rhuggenaath ta bisa ku keda na kada un di nos pa registrá ora ku nos oportunidat yega i tambe presentá, paso ainda tin hende ku ta registrá i no ta presentá. Gobièrnu sa e impakto ku lei seku tin i p’esei a opta pa tuma medida balansá kaminda ainda ta pèrmití pa entre otro sirbi alkohòl na mesa.