Willemstad,– Siman pasá djabièrnè tabata elekshon na Aruba i pa promé biaha ku un hende muhé a haña e titulo di “vote-getter” na Aruba. Y ta despues di hopi aña ku MEP ta bai ku e titulo aki. Den historia polítiko di Aruba, MEP a bai ku e titulo awor pa di tres biaha, di kual Betico Croes un biaha, Nel Oduber un biaha i awor Evelyn Wever pa di promé biaha. Mayoria biaha ta un “Eman” ta e polítiko mas gusta na Aruba.

VOTE-GETTERNAN DI ARUBA

Elekshon 1985 – Betico Croes – 8879 voto, Elekshon 1989 – Henny Eman – 5107 voto, Elekshon 1993 – Henny Eman – 6230 voto, Elekshon 1994 – Henny Eman – 5737 voto, Elekshon 1997 – Henny Eman – 5503 voto, Elekshon 2001 – Nel Oduber – 4891 voto, Elekshon 2005 – Mike Eman – 6188 voto. Elekshon 2009 – Mike Eman – 8068 voto, Elekshon 2013 – Mike Eman – 8222 voto, Elekshon 2017 – Mike Eman – 7822 voto, Elekshon 2021 – Evelyn Wever – 7518 voto.

Evelyn Wever a haña ménos voto ku Mike Eman den elekshon 2017 pero hopi mas ku Eman e elekshon di e aña aki. Si kompar’é den MEP, e no a kibra rèkòrt di Betico Croes, ku tabata 8879 voto, pero si di Nel Oduber, ku tabatin apénas 4891 voto na aña 2001. General, den historia, Wever-Croes a haña mas voto ku Henny Eman a yega di haña den su karera i a gana Mike Eman dos biaha, na 2005 i awor na 2021. 

Den seno di partido MEP, esaki a bin di sorpresa pasobra a nota hopi kampaña interno. Ta yama esaki kanibalismo polítiko, ora ta purba kita voto den e mesun partido. Asina ta nota ku MEP a bai atras den voto pero e lider a dòbel su votonan, a kosto di su mesun koleganan. Por interpret’é tambe ku Mepistanan ta konsiderá ku Wever a traha i e otronan no. Por ehèmpel Dangui Oduber a soña di haña mas voto den MEP. Su tata, Nel Oduber, a bisa den entrevista ku ku e ta pronostiká ku Dangui Oduber lo kibra su mesun rekòrt personal den e elekshon aki, siendo ku lo kontrario a sosodé i el a bai atras.

Evelyn Wever-Croes, un hurista i fiskalista, a asumí e puesto di Promé minister di Aruba i a bira e promé hende muhé pa enkabesá gobernashon di pais Aruba, despues di Henny Eman, Nel Oduber i Mike Eman.

El a partisipá den elekshon pa promé biaha pa Partido Movimiento Electoral di Pueblo (MEP) na aña 2009 komo number 3 riba lista di MEPi el a logra haña mesora 1621 voto. Na aña 2011 el a asumí liderazgo di e partido ku su mesun abuelo a funda na 1971 i el a bira e promé lider femenino di e partido, despues di defunto Betico Croes i Nel Oduber.

Komo lider den elekshon na aña 2013 el a logra 3396 voto individual, miéntras den e último elekshon na Sèptèmber 2017, ounke e partido a bai dilanti ku 2 asiento, tòg e votonan individual no a oumentá masha, pero e tabata bon pa 3503 voto riba nòmber. Den elekshon di siman pasa, Evelyn Wever-Croes a alkansá 7518 voto individual, un oumento di mas ku 110%.