Willemstad,– Minister di Enseñansa, Siensia, Kultura i Deporte señor Steven Croes a informá ayera ku e dianan di vakashon eskolar den kuadro di karnaval 2021 ta keda a vigor di akuerdo ku e roster di vakashon eskolar vigente.

El a splika ku esaki ta nifiká ku dia 8 di febrüari i dianan 15 te ku 17 di febrüari e aña aki, ta keda dianan ofisialmente liber.

E ta splika ku e skolnan ku riba nan propio inisiativa ke hasi uso di e dianan aki pa rekuperá lèsnan pèrdí, mester entregá un petishon ofisial serka Sektor di Enseñansa i Siensia via di nan direktiva di skol.

Pues apesar ku no tin karnaval i tampoko aktividatnan di Karnaval e aña aki, skolnan si ta haña e dianan liber manera semper tabata e kaso.