Nieuwe Haven—Falta 10 dia pa Korte di Apelashon por yega na un di e desishonnan mas importante den debakel di Ennia.: Balotashon di Mullet Bay i kua kompania ta keda enkargá ku e tarea.

Ennia Caribe Holding,  Banko Sentral,  ta sigui den kontradikshon riba aserkamentu di balotádo pa Mullet Bay. Korte na vários okashon, mester a posponé entrega di dokumentashonnan riba balotashon di Mullet Bay. E promé  fecha pa entrega programá pa tuma lugá riba 5 di desèmber a bai pa yanüari 2024, miéntras na Òktober a posponé kaba.

Balor di Mullet Bay Resort ta un diskushon importante pa determiná si e grupo di Ennia Caribe Holding via di EC Investment i Ennia Caribe Leven, tabatin outorisashon pa invertí for di e bolsa di aseguradonan di Ennia, den e kaso aki tambe penshonadonan. Banko Sentral a sigui kuestioná si e balor riba balans na Ennia Caribe Leven ta unu representativo. E balor di Mullet Bay a hasta yega na un diskushon den Kámara di Akountent na Hulanda. Kámara di Akountent a konkluí ku dos akountent  kende a sera bukinan di Ennia, no a duna sufisiente oposishon kontra di e balor di Mullet. Entretantu den e relato anual nobo di akountent, e balor di Mullet Bay ta bolbe keda kuestioná.

21 di Mei próksimo, e tribunal di 3 hues ta tuma un desishon kua kompania ta keda enkargá pa balotá e propiedat di Mullet Bay.  Ta trata atrobe di un desishon intermediario unda Korte di Apelashon ta bai menshoná kua kompania e ta bai apuntá pa balotá Mullet Bay. Pues na e momentonan aki, esei ta lokual tin riba mesa i no un desishon final. Pues e veredikto intermediario te ainda no tin di haber ku e diskushon di solbabilidat, de fakto Banko Sentral i Ennia nunka a hiba un demanda riba e solbabilidat di  Ennia Leven, sino riba e montante ku nan ta sospecha a saka for di e kompania. Na inisio nan a demandá riba solbabilidat, pero a kanselá esaki segun e tratamentunan tabata bayendo den korte. Te na e momentonan aki, segun Banko Sentral/Ennia e suma ei ta na 1.1 miar florin ainda. Korte a yega na 270 mion florin.