Back to Top
Responsive image
E korant di pueblo

Fayo garafal den investigashon 600 kilo a pone ku hefe tin ku bandoná Landsrecherche


November 11, 2020 • 2 minüt pa lesa

Willemstad— For di e promé instante tur instansha gubernamental pa ta mas eksakto e departamentunan di Hustisia a keda straño kon ta kue un investigashon di tal magnitut esta esun di ladronisia di 600 kilo hink’é den man di landsrecherche.

No tabatin nada kontra pa  Landsrecherche haña e investigashon pero tur hende sa ku Landsrecherche ta mas dirigí riba investigashon kontra ámtenarnan i esaki a pone hopi hende pensa mesora ku tin un ámtenar envolví den e kaso di ladronisia di e kantidat di droga for di warda di reshèrshi, pero tabata Prokurador general kual ta esun ku a enkargá landsrecherche ku e investigashon. Vigilante a keda informá ku e motibu prinsipal ku e hefe di Landsrecherche tin ku bandoná su puesto i bai bèk Kuerpo Polisial Kòrsou ta e motibu di fayo garafal ku a ser kometé den e investigashon di e sonado kaso di ladronisia di 600 kilo for di warda di reshèrshi na Garipitoeweg. Sigur esnan ku ta hasi trabou di investigashon den Kuerpo Polisial a keda straño ora ku nan a tende ku a kue e kaso di tal magnitut aki i hinka esaki den man di Landsrecherche laga nan hasi investigashon. No a dura masha ku despues di a haña e enkargo pa hasi investigashon ku a realisá detenshon di dos sospechoso. Tabata trata di un eks agente polisial i tambe un latino. Na e promé instante a basa e aresto di e agente polisial riba poseshon ilegal di arma di kandela dor ku e la entrega su retiro i a keda sin entrega e arma reglamentario. No a pasa hopi dia ku abogado di e eks  agente polisial aki a logra pone su kliente bèk den libertat. Esaki tabata un parti ku henter e investigashon a bin kai den otro ya ku tabata kier a  hasi petishon pa prolongá detenshon di e agente polisial pa asina por a kuminsá ku e investigashon di e kaso di 600 kilo ya ku su nòmber tabata ser menshoná den e kaso aki. Pero despues ku e eks polis a rekobrá su libertat tur e investigashon a bai wanta. Esaki a pone ku Prokurador General kual ta esun ku a enkargá e departamentu di landsrechershe ku e investigashon a bira loko. Outomátikamente esun ku ta supervisá e investigashon na e departamentu di landsrecherche kual den e kaso aki ta e hefe ta esun responsabel pa loke ku a bai robes. Esaki a pone ku no a keda e hefe nada mas di kuminsá hasi e intento nan pa bai bèk Kuerpo Polisial Kòrsou bèk. Mesora e saka e investigashon for di man di Landsrecherche i a pasa esaki den un tim speshal. Ta trata di un tim ku tin embargo riba dje esta ku nada no por Sali den publisidat. Loke ku su Vigilante por bisa ku tur siguransa ta ku a pone e investigashon kontra di e eks Polis un banda i awor ta investigando fuertemente un miembro di Kuerpo Polisial ku ta aktivo. Esun ku pensa ku e investigashon di 600 kilo a ser hinká den un lachi ta robes. Vigilante tambe ta siguiendo e investigashon aki basta di aserka ya ku den e kaso aki no ta trata di un simpel agente polisial pero un hefe di un departamentu di basta trayektoria. Vigilante lo bin bèk ku mas detaye den e kaso aki.



Login