WILLEMSTAD—Riba un dia manera awe, 17 aña pasá, ku tabata riba fecha 31 mart di aña 2004, tur kos a kuminsá. Esaki den kuadro di e proyekto pa por konta ku futbolistanan oriundo di nos isla i demas islanan di Antia for di eksterior, komo refuerso pa nos selekshon nashonal.

31 mart 2004

Tabata na aña 2004, riba dia 31 mart, unda awe ta hasi eksaktamente 17 aña, ku ainda hungando bou di nòmber Antia Hulandes, nos selekshon nashonal ku diferente refuerso, a mira akshon den Stadion Ergilio Hato, ku tabata yená ku fanatikonan di e deporte rei futbòl i nos ekipo nashonal.

Un ke otro despues ku nan aña 2003 a bin na e idea i a ranka sali ku e proyekto pa buska refuerso for di eksterior i asina trata na alkansá kampionato mundial 2006. Tabata aña ku entre otro tambe nos selekshon a enfrentá e ekipo FC Dordrecht i a logra triunfo ku skor di 2-1.

Pim Verbeek i Henk Duut

Tékniko Pim Verbeek, kende no ta mas ku nos na mundu, despues di fayesé riba dia 28 novèmber 2019, ku 63 aña di edat, despues di un periodo largu di malesa, tabata tékniko di nos selekshon nashonal.

Riba e ruta pa kampionato mundial di futbòl FIFA 2006 na Alemania, Pim Verbeek huntu ku su asistente Henk Duut, a konvoká 12 diferente futbolista for di eksterior, komo refuerso, pa huntu ku esnan ku tabata militá na Antia, forma un ekipo pa kompetí den e promé buèlta klasifikatorio, enfrentando Antigua i Barbuda.

Refuersonan

E 12 refuersonan aki tabata entre otro Raymond Victoria (Willem II), Nuelson Wau (Willem II), Angelo Cijntje (Veendam), Richmar ‘Rocky’ Siberie (Cambuur), Brutil Hosé (FC Dordrecht), Leon Kantelberg (Telstar), Djuric Winklaar (Lecce), Ferdino Hernandez (Ado’20), Raymond Roos (Delta Sport), Giovanni Franken (DOTO Pernis), Lennox Mauris (aktual tékniko di Jong Holland kende tabata sin ekipo) i kiper Raymond Homoet (Ajax amatùr), unda a topa Antigua den e promé wega.

2 wega vs Antigua

Tabata un seri di 2 wega bálido pa e promé buèlta klasifikatorio pa mundial 2006, unda primeramente Kòrsou a hunga komo ekipo di bishita dia 18 febrüari 2004, na Antigua i a sufri derota ku skor di 2-0. Den wega di regreso ku awe ta hasi 17 aña ku e la mira akshon, nos ekipo nashonal ta logra triunfo di 3-0, pa asina eliminá Antigua i pasa pa e di 2 buèlta, unda nos a bin trompeká na man di Hondúras.

E promé wega

Den e promé partido kontra Antigua, ku a hunga den stadion Recreation Ground na St. John’s, Kòrsou a kai vensí 2-0, despues di tabata atras ku skor mínimo na sosiegu.

Pim i Henk a hunga ku e siguiente aliniashon. Den gol Raymond Homoet, huntu ku Angelo Cijntje (Giovanni Franken 63’), Eugene ‘Djègè’ Martha, Lennox Mauris, Djuric Winklaar, Raymond Roos, Nuelson Wau, Raymond Victoria (Criston ‘Yuyu’ Brunkard 76’), Brutil Hosé, Leon Kantelberg (Richmar ‘Rocky’ Siberie 32’) i Ferdino Hernandez. Banda di esakinan tabatin tambe Shargene Forbuis, Danielo Trinidad, Curtly Hooi, i kiper Marcelo ‘Chelo’ Pisas komo suplente na banki.

“Eksaktamente 17 aña pasá…. riba dia 31 mart 2004 !”

Miéntras tantu tabata den wega di regreso, ku a hunga riba un fecha manera awe, 17 aña pasá, kosnan a bòltu, unda ku den Stadion Ergilio Hato, e selekshon di Antia ta logra triunfo ku skor di 3-0 pa eliminá Antigua i Barbuda.

Na sosiegu e selekshon di Antia tabatin bentaha mínimo, despues ku Richmar ‘Rockie’ Siberie a anotá na di 27 minüt di wega. Hungando apénas 1 minüt den e parti komplementario Eugene ‘Djègè’ Martha ta oumentá e bentaha na 2-0, pa seguidamente Brutil Hosé, seya e triunfo i eliminá Antigua poniendo e skor na 3-0, hungando 48 minüt.

Riba e dia aki, téknikonan Pim Verbeek i Henk Duut, a hunga ku e siguiente aliniashon. Den gol Marcelo ‘Chelo’ Pisas. Tayron Mongen (dft)(Angelo Cijntje), Eugene Martha, Daniel Rijaard, Giovanni Franken, Raymond Roos, Djuric Winklaar, Ferdino Hernandez (Lennox Mauris), Chaly Jones, ‘Rocky’ Siberie i Brutil Hose (Shargene Forbuis).

Miéntras ku e otronan ku tabata na banki komo suplente i no a mira akshon, tabata kiper Raymond Homoet, Robert ‘Obyrast’ Winklaar, Shayron ‘Shai’ Bernardus i Kenneth Cicilia.

17 aña despues

Miéntras tantu awe, 17 aña despues Kòrsou ta enkabesá Grupo C, riba e ruta pa trata na alkansá e di 2 buèlta klasifikatorio pa mundial 2022, despues di a golia St. Vincent 5-0 i derotá Cuba 2-1.