WILLEMSTAD,—-Ya ta konosí ku e aña aki, no tin Festival di Tumba,pero si ta bai tin Tumba Revival Festival 2021, esaki ta pa rekordá e 50 ganadónan di Festival di Tumba, i tambe ta selebrá e echo ku e aña aki ta nèt 50 aña pasá ku e promé Festival di Tumba a tuma lugá, den Teater Roxy na aña 1971.

Loke ku hopi hende ta pendiente di dje ta e fecha nan pa loke ta trata Festival di Tumba 2022. Ya ta un tradishon ku Korant Vigilante semper despues di Festival di Tumba ta anunsiá e fecha nan di e siguiente aña. Pa tur hende ku tabata pendiente, inskripshon lo bai ta dia 23 di yanüari, i un siman despues ku ta dia 31 di yanüari lo bai ta e promé anochi, i di dos anochi ta 1 di febrüari di tres anochi ta 2 di febrüari i e anochi final ta dia 4 di febrüari.

Pero mester keda kòrda si ku, tur kos mester normalisá, ta den e forma aki so, Kòrsou por bai tin tantu su marchanan di karnaval i tambe su Festival di Tumba, kaminda ku lo bai selebrá 51 aña pero 52 edishon. Tur kantante kompositor i areglista, esaki ta e fecha nan pa loke ta trata e kuater dianan di Festival di Tumba 2022.

For di awor aki mester bisa ku agrupashon musikal GENTZ TRE’CHIC, ta presentá riba djarason, GENTZ tin e Rei di Tumba 2020, pues nan tin e derecho pa pasa dirèkt riba e di res dia, sin mester pasa den e buzon di lòt. Amantenan di Tumba, marka e fecha nan aki bon den boso agènda, pasó, promé ku bo pensa nos ta para den luna di desèmber, di asina lihé e dianan ta pasa bai.