Back to Top
Vigilante banner image

Fin di luna lo lansa sertifikado digital di Covid-19


September 14, 2021 • 2 minüt pa lesa

Despues ku Aruba i Sint Maarten a lansa e sistema di sertifikado digital pa Covid-19,
pronto esaki lo keda implementá na Kòrsou tambe.

PUNDA- Segun informashon duná pa Minister di Salubridat di Kòrsou, Dorothy Pietersz-Janga, e sertifikado digital di Covid-19 lo lansa na Kòrsou fin di sèptèmber 2021.

Paisnan Oropeo a sera un akuerdo pa por tin un sistema general ku tur pais den Oropa por verifiká status di bakunashon i pa veriguá tèstnan ku a keda hasí promé ku buelo pa por drenta un pais. E sistema aki a keda desaroyá den i yamá Sertifikado Digital di Corona pa paisnan Oropeo (EU DCC).

Komo ku Hulanda ta forma parti di Union Oropeo, e islanan den Reino tambe a haña e oportunidat pa forma parti di e sistema aki. E sertifikado digital (DCC) ta fasilitá biahamentu entre e paisnan ku ta forma parti di Union Oropeo.

Manera ya nos a bin ta informá, hermana islanan Aruba i Sint Maarten ya a implementá e sertifikado digital di Covid-19 yamá DCC. E sertifikado digital ta duna informashon si un persona a bakuná kontra Covid-19, ta duna resultado di tèst negativo pa Covid-19 i tambe e ta fungi komo un sertifikado di prueba di rekuperashon despues di infekshon.

Hermana isla Aruba a implementá e sertifikado digital di bakunashon na komienso di ougùstùs 2021 i pa fin di ougùstùs tur tres sertifikado tabata disponibel riba plataformanan digital.

Na komienso di sèptèmber Minister di Salú Públiko, Desaroyo Sosial i Labor (VSA) na Sint Maarten, Omar Ottley, a informá poblashon di Sint Maarten durante un rueda di prensa tokante lansamentu di e sertifikado digital di Covid yamá DCC. E sertifikado digital ta un inisiativa di Union Oropeo kual lo yuda suidadanonan biaha ku libertat entre e paisnan den Union Oropeo durante e pandemia di Covid-19.

Si tur kos kana segun plan e siman aki, 15 sèptèmber, lo tin un “soft launch” di e sertifikado digital na Kòrsou i pa fin di sèptèmber e asina yamá “health app” lo ta riba merkado, esaki minister di Salubridat di Kòrsou a duna di konosé.

Segun informashon optené lo kuminsá ku trámitenan di aplikashon pa un sertifikado digital di bakunashon via wèpsait, i na momentu ku e “health app” finalisá esaki lo keda implementá.

Login