Back to Top
Responsive image
E korant di pueblo

Final di 'Champions League' a muda pa Portugal


May 12, 2021 • 1 minüt pa lesa

INGLATERA – E final di Champions League entre Chelsea i Manchester City a muda ofisialmente pa e siudat di Porto na Portugal.

Manera ta konosí, UEFA mester a kambia e sede di e final ku tabata Istambul pa di dos aña konsekutivo, mirando ku Turkia a keda inkorporá djabièrnè último riba e lista di paisnan ku inglesnan no por bishita, debí na e brote di coronavírùs na esakinan.

Mes ora a bin riba e idea pa laga e enkuentro di dia 29 di mei próksimo tuma lugá den Wembley, pero e kòmbersashonnan di djaluna último entre UEFA i e gobièrnu ingles no a kondusí na nada.

Aparentemente e outoridatnan ingles no a aseptá un petishon di e organisadónan di e kompetensia aki, ku ta di pèrmití entrada na periodistanan, patrosinadornan i algun invitado spesial, segun medionan di komunikashon a informá.

UEFA a disidí ku e final ta tuma lugá den e ‘Estadio Do Dragao’ di Porto ku tin un kapasidat pa 50 mil fanátiko i lo pèrmití un kantidat di fanátiko presente durante e final di dia 29 di mei próksimo.

Portugal ta figurá riba e ‘lista bèrdè’ ku ta konsistí di 12 teritorio (di rísiko abou) di kua e biaheronan ingles no tin nodi di bai den kuarentena entrante djaluna próksimo. Esaki sigur lo fasilitá e biahamentu di e fanátikonan di Chelsea i Manchester City.

Login