WILLEMSTAD – E organisashon CHATA, CASHA, CTB i SBAB a reuní un biaha mas, manera tur luna riba kombatimentu di hürmentu ilegal di mansion i apartamentunan ku turista.

Segun Minister di Finansa Javier Silvania, esei ta un kompetensia inhustu pa ku hotèlnan ku si ta paga impuesto. E proyekto akí tin prioridat di e Minister di Finansa. Silvania a duna órden pa masalmente pone e asina yamá ‘taxatieve aanslag’ riba e hendenan akí. “Ta inhustu ku hendenan ku mansion kant’i laman no ta paga belasting. MinFin ta kontentu ku CTB ta pone dos di su trahadónan na belastingdienst pa yuda ku e trabou”, asina Silvania a bisa den medionan sosial.

Ta manda ‘taxatieve aanslagen’ ora ku un pagadó di impuesto no kumpli i entregá su aangifte na tempu. E ‘taxatieve aanslag’ aki ta un kalkulashon dje Inspektor di Impuesto di e montante ku e persona debe. E suma aki hopi biaha ta mas haltu, pa duna insentivo na e persona pa e hasi aangifte tòg.