Fiskal Dennaoui, ayera a manda un atvertensha serio.

Nieuwe Haven—Ayera den korte di hustisia, un biaha mas tabatin tratamentu di un kaso unda un hòmber di 34 aña B., a keda akusá di a tene relashon ku un damita menor di edat. Fiskal di Ministerio Públiko Dennaoui a enfatisá den korte ayera pa esnan ta duda den edat, pa pidi sédula promé di bai tene relashon.

E hòmber B. ta wòrdu akusá ku durante tres dia den luna di Ougùstùs a tene relashon ku un dama menor di edat. Segun B.  e akusashonnan ta kuadra. Ayera den korte, B. a splika ku nan a papia i pasa chines pa buska kuminda. Na kas nan tabata papia i einan a tene relashon. Pero e dama, a atmití di tabata kier a tene relashon. B a sugerí pa yama e mama i bisé ku e ta bai keda drumi. Segun B, e dama a bisé di a papia ku su mama.

Siguiente dia, B. a bisa  e dama ku e mester hib’é kas pasobra e mes tabatin mas kos di hasi. Na e momentonan ei, B., no tabata altura ku e dama tabata menor di edat. E relashon a tuma lugá riba djabièrnè i siguiente dia tambe riba djasabra. Riba djasabra nan a kore hasi algu kos . B, tabata kombensé ku e dama a informá su mama. E intenshon tabata pa warda te ora 8 or bati, pa e hiba e damita kas.

Segun B., na dado momento tabatin batimentu na porta. Ora e la bai papia, tabatin dos persona puntrando pa e dama. E dos personanan tabata den kompania di polis.

Nan a hib’é warda di polis i einan B, a keda informá ku tabata trata di un dama kende a kore bai fo’i kas. Segun B., e no tabata na altura di esaki. Kontinuando den outo di polis, e dama ta informe ku e tabatin 17 aña. Pero na momento nan a yega warda di polis, einan e la bin komprondé ku ta 15 aña e dama tabatin. Hues a punta B, ku si pa 17 aña tambe ta bon por e drumi ku e damitanan, pasobra 16 ta nèt e edat mínimo pa por tene relashon. Na polis, e la deklará ku 20 aña ta su límite pa tene relashon ku un dama. Ayera e no tabata por a splika dikon tòg e la drumi ku un dama menor di edat.

B. ta opiná ku e no ta sinti su mes kompletamente kulpabel. Pero ayera e tabatin problema pa duna korte mas splikashon. Tabata riba 26 di ougùstùs ku e la buska e dama. E kontakto a inisiá via di facebook. E mama a duna keho na polis. Riba 26 di ougùstùs e la bai fo’i kas i bisé di ta bai serka un primu, pero e no a bai einan, Alrededor di 5 or djasabra, nan a busk’é via  internèt i nan a hañ’é na kas. Einan e dama a atmití di tabatin kontakto ku B.

E damita na polis a deklará di a tene relashon ku B., pero no tabata ke pa polis enkarselá B. E damita a atmití di a gaña B di tabatin 17 aña. Segun e damita na polis, ta e no mester a tene relashon ku B. E damita splika tambe ku B. no a uza kondon.

Fiskal di Ministerio Públiko mr. Dennaoui ayera a akusá e hòmber di konsientemente a tene relashon ku menor di edat. Segun e fiskal, e por komprondé deklarashon di B, pero e akto ta penal. E fiskal ayera den korte a enfatisá pa tur hende, kende ta bai drumi of tene relashon ku un persona, pa puntra pa sédula promé di e akto. Den e kaso aki, si B. lo a hasi esei, e ta hòmber liber. E fiskal enfatisá ayera ku via di facebook tin hopi kontakto ku ta tumando lugá entre mayornan di edat i menornan. Ta un desaroyo peligroso, e la duna di konosé pasobra e menornan ta kore riesgo. Ademas e la splika tambe pa kada mayor buska i investigá kiko nan menornan di edat ta hasi riba ret sosial. E fiskal a demanda 15 luna kual 12 ta kondishonal ku tempu di prueba di 3 aña. Hues a haña e akusashon proba.  E la duna kastigu konforme demanda di fiskal.

Ayera a bin sali na kla, ku B., ta un yu adoptá i ta bin for di un famia amabel ku a kri’é i duna sosten. Hasta ayera e pareha ku a adopt’é tabata sinta den korte pa duna sosten.