WILLEMSTAD – Korte Supremo di Hulanda (“Hoge Raad”) a anulá un sentensia di Korte Komun di Hustisia (Hof) den un kaso di hür entre Fundashon Kas Popular (FKP) i un hürdó ku for di 2008 ta hür un kas sosial di FKP.

Segun e Korte di mas altu, Korte Komun di Hustisia no a motivá sufisientemente pakiko a rechasá e apelashon di e hürdó riba e statuto di limitashon (“verjaring”) di un parti di e debe. Awor e kaso a keda mandá bèk pa Hof trata esaki di nobo.

E kaso ta trata debe di un hürdó ku for di 2008 ta hür un kas sosial di FKP. Pa motibu ku añanan largu e no paga hür, e debe a subi te na mas di 31 mil florin na fin di 2022. Den e prosedimentu akí, Korte a buska un solushon struktural pa e problemátika grandi di debenan di hür serka FKP. E fundashon ta duna di konosé ku mitar di su 5 mil hürdónan no ta paga hür konforme regla, miéntras ku tin mas di 8 mil persona riba e lista di espera pa un kas sosial.

Den e veredikto di 26 di novèmber 2024, Korte a determiná ku e hürdó mester a paga e debe di hür for di 1 di yanüari 2018 den término. Despues ku paga e parti ei, e sobrá dje debe mas bieu lo a keda anulá. E hürdó a bai den kasashon serka Korte Supremo, argumentando entre otro ku un parti di e debe ya a surpasá e statuto di limitashon. Ku otro palabra e parti ei a kaduká kaba. Korte Supremo a duna e hürdó rason riba e punto akí. Komo ku henter e debe por a bira pagabel atrobe si e hürdó no a kumpli ku e kondishonnan di pago nobo, Korte mester a investigá eksplísitamente si un parti di e debe a kaduká. Segun Korte Supremo, esaki no a keda hasíi sufisientemente.

Di otro banda, Korte Supremo ta sostené un parti importante di e maneho di Hof. E apelashon den kasashon di FKP, den kua e fundashon a protestá kontra e “kwijtschelding” (anulashon) di debenan di promé ku 2018, a keda rechasá. Korte Supremo a huzga ku Hof a motivá korektamente ku, segun normanan di rasonabilidat i hustisia, ta inaseptabel pa despues di hopi aña ainda eksigí pago di debenan ku a subi pa motibu di falta di un maneho di kobramentu (“incasso”) efektivo di parti di FKP. E kaso mester keda tratá di noboa awor pa Korte Komun di Hustisia na Kòrsou, kaminda mester tuma e defensa di vensementu dje debe bon den konsiderashon.