Parera—For di Desèmber 2023, presensia di Dean Rozier den e dilnan ku Oryx/Refineria di Kòrsou tabata riparabel. Oryx Petroleum konforme sondeonan riba internet, no ta duna indikashon di ta un kompania aktivo. Te ainda Oryx Petroleum ta mustrando di ta un kompania “dormant”, esta no aktivo.

Pero meskos ku tabata e kaso den e konsorsio di Caribbean Petroleum Refinery, Refineria di Kòrsou a keda sin divulgá e informashonnan nesesario. Despues konforme registro den Kámara di Komersio, ta sali na kla i konfirmá ku Rozier ta tras di Oryx. Pero for di 19 di desember 2023, a senala e komersiante lokal, Dean Rozier  den restorant Amazia, na momento e delegashon di PDVSA tabata komiendo ku representantenan di Refineria di Kòrsou, CRU i ministernan den kabinete Pisas II.

Rozier, tabata komo invitado na e almuerso òf aló ménos tabata presente na  kual okashon e tabata papiando ku representantenan di e delegashon internashonal ku tabata na Amazia. Na Desember,  Gobièrnu di Kòrsou i Refineria di Kòrsou a tene un seremonia di fiesta pa anunsiá un akuerdo riba repago di debenan ku PDVSA tabatin na Refineria di Kòrsou mediante entrega di produkto. Ta trata di un ‘Settlement Agreement’, den kua a fiha un akuerdo kaminda ta interkambiá krudo pa e debe habrí ainda na Kòrsou. Segun RdK, ku esaki a marka un momentu signifikante den e proseso ku RdK i PDVSA a enkaminá e último añanan, entre otro den korte di arbitrahe i finalmente riba un manera amikal na mesa di negoshashon. Promé ku e seremonia di fiesta den e sala prinsipal na Amazia, Rozier tabata sinta na mesa den e restorant ku dos representante internashonal papiando. Esei ta indikashon ku for di Desèmber 2023, ya kaba Refineria di Kòrsou i Orxy tabata riba kaminda pa yega na un areglo. No ta konosí, kon e struktura finansiero entre Oryx i Refineria di Kòrsou a keda reglá. Pisas a anunsiá 70 mion florin di invershon, kual no tei sali for di e bolsa di Rozier.