WILLEMSTAD – Brantwer Kòrsou huntu ku Brantwer Aruba i Brantwer Hato a start un trayekto di formashon riba e área di instruktor i “vakinhoudelijke bijscholing” pa algun kolega den e diferente kuerponan di bombero. E trayekto di formashon a start dia 28 di mart 2022 i a terminá dia 29 di aprel último.

Durante e promé 2 siman, diesun (11) kolega repartí den e kuerponan di bombero di Kòrsou, Aruba i Hato a sigui un kurso intensivo ku na final a ser terminá ku èksamen práktiko. Tantu kuerpo di bombero Aruba, Kòrsou i Hato por ta orguyoso ku tur personal ku a partisipá a logra haña nan diploma di Instruktor B, kual ta un diploma rekonosé na Hulanda.

Pa Brantwer Kòrsou esaki ta un stap importante den desaroyo di e kuerpo den preparashon pa tantu e hóbennan nobo ku lo bai drenta Brantwer, pero tambe pa “bijscholing” di e personal di warda. E parti di sertifikashon di nos personal ta importante pa asina por brinda un nivel mas haltu di entrenamentu i asina elevá e nivel di servisio i seguridat brindá dor di nos kuerpo di Brantwer.

Brantwer Kòrsou ta felisitá e seis instruktornan nobo (sinku di Brantwer Kòrsou i unu di Brantwer Hato) ku nan diploma di Instruktor B i e sinku personal di Brantwer Aruba ku nan diploma di Instruktor B. Danki tambe na e kuater instruktornan sertifiká dor di BOGO Brandweeropleidingen, esta Jolanda Leferink, Henri Tanamal, Cees Schaap en Frans van de Watering pa e periodo intensivo di lès i preparashon pa e personal por a pasa èksamen final ku éksito i haña “bijscholing vakinhoudelijk”.

E siguiente preparashon ku ta sigui pa personal di Brantwer Kòrsou ta “Leer werkplekbegeleider” na Aruba den e periodo di 9 te ku 13 di mei 2022. Mas informashon lo ser duná despues relashoná ku e preparashon ei tambe.