Willemstad,– Vigilante a tuma kontakto ku e hefe di BTP señor Franklin Sluis, kende a splika Vigilante ku pa un remplasante pa hefe di servisio, no mester kana e proseso di solisitut habri.

El a splika Vigilante ku esaki no ta bèrdat i ku ta for di aña pasa a kuminsá ku un proseso kaminda a hasi un assessment ku tres persona i ku den un kaso asina, por nombra un remplasante gewon.

E direktor di BTP señor Franklin Sluis a bisa Vigilante ku for di aña pasa a manda un karta pa minister bai di akuerdo ku pa un di yanüari señor Curt Belfor bira e remplasante.

El a sigui konta Vigilante ku pa remplasante no mester di solisitut habri. Tres persona a ser entrevista i ningun di e dos otro personanan ku eksepshon di señor Belfor no tabata interesá. Pues aki ta papia di e tres personanan ku a hasi assessment.

“Mi no sa ku tabatin hende ku no tabata den e tres nan ei ku tabata interesá. A hasi selekshon di esnan ku ta haña ta mas kapas pa e puesto di remplasante. Entre nan a hasi un eskoho i ta despues di a papia ku nan, tabatin dos ku no tabata interesá”, asina señor Sluis a bisa na Vigilante. Tambe el a bisa nos ku señor Belfor na diferente okashon a fungi komo su remplasante. “Tres (3) kolega ta funshoná komo mi remplasante ora mi no tei i mi a papia ku nan tur tres di kual Belfor ta unu di nan, ta trata di un hurista ku hopi aña di eksperensia”, asina señor Sluis pues a bisa Vigilante. Pa loke ta IPE , el a splika nos ku tin diferente otro hende mas den e instituto i ku simplemente señor Belfor ta un di nan.

El a sigui splika Vigilante ku pues na momentu ku e baha otro aña den lua di yüni, ta keda na e minister ku ta sintá pa nombrá ken ta keda komo direktor. Hasta el a splika Vigilante ku tempu di señor Bernadina tambe el a nombra señora de Canha i pues ta minister lo bai disidí ken ta bira e próksimo direktor di BTP.