Colon: momento e promé pago riba debe Venezolano a yega Kòrsou.

Bullenbaai—Segun un konseho hurídiko prosedente di e kompania na Miami Florida, InterJuris, aparte di Refineria di Kòrsou, Caribbean Petroleum Company i CRU, tin dos kompania mas envolví den e transakshon di fuel oil na Bullenbaai. 

Ta trata di Knob Trading S.A.(KTSA) i United Petroleo Corporation (UPC). E konseho di InterJuris, ta resultado di un petishon ku Caribbean Petroleum Refinery di grupo Giusti, a laga hasi riba entrega di e 600 mil bari di fuel oil na Bullenbaai. E konseho ta unu resien entrega na Caribbean Petroleum Company riba 18 di Novèmber último.

E konseho ta konkluí ku e kargamentu di fuel oil prosedente di Venezuela pa Bullenbaai riba e barku Colon no tabata kontra di sanshonnan imponé pa Estádos Unídos riba Venezuela. Segun e konseho di e abogadonan na Miami, riba 2 di ougùstùs 2022, CRU i Caribbean Petroleum Refinery BV, CPR a sera un akuerdo di entrega.  Aparte di e akuerdo menshoná, kual akuerdo a keda asertá riba 27 di sèptèmber último, tin un akuerdo adishonal. Entre CPR i Knob Trading SA tambe a sera un akuerdo pa almasena riba 24 di ougùstùs, komo un sup kontrakt.

Segun e struktura pa entrega Fuel Oil na Bullenbaai, KTSA a ofresé su servisionan na United Petreoleo Coporation (UPC), kual último ta un kompania privá i ta kréditor di gobièrnu Venezolano. Segun e konseho di e abogadonan na Miami, gobièrnu di Venezuela tin un debe mionario serka UPC. E abogadonan ta sigui menshoná den e parti “splikatorio” di nan konseho ku UPC a risibi, komo un pago di debe, un kantidat di “zeta” prosedente di Venezuela. Segun e lista di kargamentu di e tènker Colon, tabata trata di 496 mil bari di (42 galon) di Fuel Oil, konsigna pa PDVSA S.A.. Colon a tuma e kargamentu na Amuay Bay na Venezuela, manera publiká pa Vigilante fo’i dia Colon a yega Kòrsou.

Segun e abogadonan, e kargamentu di e Fuel Oil den Bullenbaai, ta propiedat di e kompania UPC. Manera menshoná, UPC ta un kompania establesé via di off-shore na Panama. Gobièrnu di Venezuela debe UPC i ta pagando e kompania awor ku kargamentunan di Fuel Oil. Ta bin sali na kla, segun e abogadonan na InterJuris, Caribbean Petroleum Refinery di Giusti ta den relashon di kontrakt ku KTSA i no tin kòntròl riba e akuerdo será entre KTSA i UPC.

Segun e abogadonan, e struktura di entrega, no tabata kontra di e sanshonnan imponé. Pa lokual ta trata e situashon di Refineria di Kòrsou i grupo Giusti, (CPR), e transakshon ta bai lanta pregunta. Den sentido si Caribbean Petroleum Refinery ta fungi komo intermediario logístiko pa kompanianan internashonal ku Venezuela debe, mientras ta spera e kompania di ópera Bullenbaai pero tambe inisiá e proseso pa rafiná krudo.