Back to Top
Vigilante banner image

Fuel Oil den tankinan na Bullenbaai ta pegá


January 27, 2023 • 2 minüt pa lesa

Ilegal: segun Patrick Newton, Hulanda a manda puntra riba e entrega sin lisensia di fuel oil.

Punda–  Un kantidat di kasi 500 mil bari di 42 galòn ku fuel oil den Bullenbaai ta pegá. Ta trata di e promé kargamentu ku RdK i CPR a anunsiá den kuadro di nan akuerdo pa maneho na Bullenbaai. Awor ku tin diskushon internashonal riba legalidat di e kargamentu, CPR no a logra saka e kargamentu ainda for di Bullenbaai.

E entrega a bin kai den notisia internashonal despues ku agenshanan di prensa Reuters i Associated Press a skibi riba e tópiko.  Associated Press, ta akusá Kòrsou i Refineria di Kòrsou di a desviá i despistá areglonan di sanshon ku Venezuela. Segun un informe publiká pa e agensia, un kantidat di 600 mil ton di “fuel oil” a drenta Bullenbaai prosedente di Venezuela. Esaki ta un desvio for di e areglonan di sanshon. Despues ta bin resultá ku RdK a gana tambe riba e kantidat di fuel oil ku a drenta Kòrsou.

Segun Patrick Newton, direktor di RdK, e kargamentu di 600 mil bari di fuel oil ku a yega Kòrsou for di Venezuela,  riba 28 di sèptèmber, tabatin lisensia di OFAC pa transbordá. Esaki ta lokual Patrick Newton direktor di Refineria di Kòrsou a konfirmá na Vigilante. E deklarashon di Newton, ta kontradesí ponensianan di AP i Reuters.

Djarason 28 di sèptèmber, pa 4’or di atardi, e botonan di tou Manta i Ola i e boto NC 6-L di Kompania di Tou Kòrsou (KTK) a guia e barku Colon pa mara na Bullenbaai Jetty-1.  E barku Colon a bini ku un karga di 600.000 barí di ‘fuel oil’ pa almasená na nos terminal. E barku a sali direkt for di Venezuela pa Korsou. Colon a trese e promé karga di produktonan petrolero pa almasená na Bullenbaai komo parti di e akuerdo entre CRU, e kompania supsidiario di Refineria di Kòrsou (RdK), kual ta permití Caribbean Petroleum Refinery (CPR) almasená produkto na e terminal di Bullenbaai. E akuerdo di almasenahe ta pará lòs for di e akuerdo di mas aña pa operashon di refineria i e terminal na Bullenbaai ku Refineria di Kòrsou i CPR ta negoshando aktualmente. E akuerdo ta enserá ku lo por almasená te ku 7 mion barí di produkto na e terminal.

Segun un komunikado ofisial, CRU i RdK tabatin basta trabou di preparashon promé ku por a kuminsá risibí produkto pa almasenahe na Bullenbaai atrobe. COLON, un tènker di 250 meter largu, segun informashon riba Internet a yega for di bahia Amuay Venezuela. Na Amuay tin un refineria ubika riba e península di Paraguana na Venezuela. Ta trata di unu di e refinerianan mas grandi na mundu ku un kapasidat di 630.000 barí diario. Venezuela tabata proveé kasi 13% di produktonan petrolero na Estádos Unídos promé di e embargo. Te ainda tin embargo Estado Unidense riba krudo i kombustibel venezolano. Te ainda ta e kompanianan Repsol i EniSpa tin outorisashon pa tráfika krudo venezolano.

Aparentemente e krudo riba e barku Colon no tabatin lisensia di OFAC pa transbordá. OFAC ta nifiká Office of Foreign Assets Control. Ta trata di e agensia ku ta atministrá i kontrolá embargonan imponé pa gobièrnu estado unidense. E lisensia di OFAC ta outorisá eksepshon riba e embargo. Tin dos tipo di lisensia OFAC, unu partikular i unu general. No ta konosí bou di kual a transbordá e fuel oil pa Kòrsou.

Login