E parke Marie Pampoen lo haña diferente mesa di dominó.

 Marie Pampoen,– Riba 27 ougùstùs próksimo Fun Miles ta tene un rueda di prensa pa asina presentá nan mesanan dediká pa hunga dominó ariba ku ta bai wòrdu lokalisá na Marie Pampoen su parke di rekreo.

E parke di rekreo na Marie Pampoen ya ta bai hasi dos aña i Fun Miles ta birando un dje promé kompanianan ku ta opta pa spònser e área pa asina sigurá ku pueblo di Kòrsou ta sigui rekreá den e área. Den e kaso aki Fun Miles a opta pa kordiná ku MCB, Kooyman, Van den Tweel, Ennia i Beton Industrie pa krea mesanan di dominó pa duna bèk na komunidat ku ta bishitá Marie Pampoen riba un forma regular.

E tim di Fun Miles no ke a duna muchu informashon promé ku e enkuentro ku prensa, pero Fun Miles a duna indikashon pakiko a opta pa invertí bèk den komunidat ku ta bishitá Marie Pampoen. Segun informashon, Marie Pampoen ketubai ta un parke den desaroyo. I e parke ta un área kaminda prinsipalmente hendenan lokal ta rekreá. Tin hopi mucha i hende grandi i un área dediká pa muchanan hunga. I esaki tabata e rason pakiko Fun Miles a mustra interes pa kontribuí na e área aki.

Despues ku ya e parke ta habrí pa dos aña por nota ku un kos a bira sigurkual ta e kantidat di hende ku ta bishitando e parke riba un forma diario. Mayornan ta bai ku nan yu nan pa e kriaturanan hunga, adultonan ta hasi ehersisio den e área destiná i ya kaba diferente persona a tene fiesta den e área nobo. For di esaki por nota ku demasiado interakshon sosial ta tumando lugá den e parke públiko i esaki por sierto ta un bon desaroyo pa e área. Muchanan di bario tambe ku basta regularidat ta bishitá e área i asina otro muchanan di otro bario tambe ta sera amistat ku konosí nan nobo. Tambe pa usa e fasilidatnan  ta totalmente grátis, pues tur rango di komunidat por bishitá i disfrutá di e parke, kual ta algu balioso pa e sentido di komunidat na Kòrsou.

Ekspertonan urbano riba nivel internashonal tur ta di akuerdo ku parkenan públiko ta esensial. E benefisionan ta inkluí redukshon di krímen, oumentá salubridat públiko i enkurashá ekonomia lokal. Kaminda ántes planifikashon urbano tabata pusha pa tur hende tin nan propio kurá,  awor ta resultado ku planifikashon urbano ta preferá pa traha un parke grandi kaminda un i tur(sin kurá) por disfrutá di dje.

Por sierto un bunita gesto pa mira kon kompanianan privá tambe ta trata na promové interakshon nan sosial den nos komunidat lokal.