WILLEMSTAD,–  Fundashon Pro Bista a terminá e trayekto di guia di orientashon i mobilidat pa un grupo di 9 kliente ku abilidat básiko i 3 kliente ku abilidat avansá. Fundashon Pro Bista ku e reto pa eliminá su lista di espera ku aktualmente ta mas ku 100 persona a start trayektonan di guia den grupo.

Fundashon Pro Bista ta gradesido ku e por a otorgá ku éksito 12 kliente nan ‘ loopbewijs’ . E ‘ loopbewijs’ aki tin mes un propósito ku e ‘rijbewijs’ manera nos konosé pa hasi uso di nos kareteranan, pues finalisando e ‘ lèsnan i eksámen ku éksito, komunidat por konfia ku e persona por move ku guia òf sin guia na un manera responsabel.

E 3 klientenan ku a risibí nan ‘loopbewijs’ avansá, ta esnan ku a asistí e profeshonalnan den e trayekto di guia, komo un guiadó responsabel. Ku e inisiativa aki Fundashon Pro Bista ta spera di wak mas hende ku problema ku bista move ku siguransa paden i pafó di kas, riba kaya i den komunidat. Alabes pa esnan ku limitashon visual sigui fungi tambe komo guiadó i empoderá esnan ku no tin masha eksperensia ku su limitashon visual. Fundashon Pro Bista ta gradisí esnan pa nan sosten duná nan e klientenan den nan trayekto,prinsipalmente riba e ruta di Corriweg i na Sentro Deportivo Kòrsou. Tambe ta pidi e komunidat kompleto pa sigui koperá i aportá, pa asina hendenan ku problema di bista, por sigui riba e ruta di tin un bida mas independiente ku ta posibel. Kòrda follow Fundashon Pro Bista riba nan medionan sosial!