Back to Top
Responsive image
E korant di pueblo

Futuro sosio di CPA: Un biaha mas Port of Rotterdam ta kibra rekòrt narkotráfiko durante 2020


January 16, 2021 • 2 minüt pa lesa

Bishita: alkalde di Rotterdam. Na Ougùstùs 2019 alkalde di Rotterdam, Ahmed Aboutaleb, a bishita Hunta di Minister

Punda—E futuro sosio di CPA, Port of Rotterdam kende tei bira 20% doño den operashon di Bahia Santa Ana na Kòrsou, a bolbe sobresalí. Segun prensa Hulandes, team di HARC na Hulanda (Duana, FIOD, OM) a interseptá un total di 40.641 kilo kokaina den haf di Rotterdam den 2020.

Esaki ta kasi 7000 kilo di kokaina mas ku den 2019, den kua a interseptá 33.732 kilo. E team ta traha den hafnan di Vlissingen i Moerdijk tambe. Na Vlissingen tabatin 10 investigashon ku a interseptá 6055 kilo kokaina i na Moerdijk dos investigashon kaminda a konfiská 967 kilo kokaina. Den luna di desèmber outoridatnan na Rijnmond a interseptá un rekòrt di 7.620 kilo di kokaina.

Port of Rotterdam. 180 mil empleado.

Na Ougùstùs 2019 alkalde di Rotterdam, Ahmed Aboutaleb, a bishita Hunta di Minister. Aboutaleb ta Alkalde di Rotterdam. Haf di Rotterdam, ku tin interes pa kumpra akshon den CPA  ta kousando bèrgwensa pa e ulandesnan. Via e haf ta importá anualmente alrededor di 2.2 miar euro na balor di kokaina. Esaki ta hasi Rotterdam unu dje suidatnan narkotrafikante mas grandi na Oropa. E Haf di Rotterdam ta u desaster. No ménos ku 8 mion kònteiner ta drenta haf di Rotterdam tur aña, den kual solamente 40 mil ta pasa den screening/scanner  i for di kual ménos di 6 mil ta wòrdu habrí pa duaneronan. No tin niun klase di kontrol riba e importashon deskabeyá di kokaina. Haf di Rotterdam tei bira 20% doño di CPA i lo no tin niun duda, ku Biaha Santa Ana tei bira un transborde pa kokaina rumbo Rotterdam.

E haf di Rotterdam tin riba 180 mil empleado. Na área kubrí, ta trata di alrededor di 25 mil tereno di futbòl. Na mei 2019, munisipio di Rotterdam a laga e Universidat mas renombrá di Ulanda den komersio, Erasmus Universiteit, hasi un investigashon riba siguridat di nan haf. E estudio a konkluí ku e departamentonan hudisial dje suidat no tin sufisiente kòntròl riba siguridat den Port of Rotterdam. E estudio di Erasmus a wòrdu ouspisiá pa Ministerio Públiko, Duana i Kuerpo di Polis na Rotterdam. Segun e investigadónan na Erasmus por lo ménos un kuart di kokaina importá pa Oropa ta drenta via haf di Rotterdam, e futuro sosio di CPA.

Mayoria droga ku drenta e haf di Rotterdam ta den kònteiner di fruta i berdura. Esaki pasobra e kònteinernan aki tin urgensha riba nan i no por para largu den haf debí na fechanan di vensementu dje produktonan konserní.  Segun un reportahe di NOS, Port of Rotterdam tin diferente video grabá unda  por mira kon organisashon narkotráfiko ta drenta haf di Rotterdam ku arma outomátiko i ta kore kònteiner saka sin niun hende interseptá esaki. Pa tal motibu mester wak e dil ku Port of Rotterdam hopi bon.

E tendensia ta lotenan mas grandi ku ta keda importá kompará ku añanan anterior. Asina den 2020 tabatin 12 lote di riba 1000 kilo di kokaina ku a keda interseptá. E balor total di e kokaina interseptá den 2020 ta alrededor di 3,5 miar euro. Duana a indiká ku tantu den eksterior komo Hulanda outoridatnan a interseptá alrededor di 115.000 kilo di kokaina destiná pa hafnan hulandes den 2020. A base di e lotenan konfiská e team di HARC Rotterdam a start 151 investigashon ku a interseptá e total di 40.461 kilo di kokaina. Den 2020 Duana i polis di haf a detené 152 sospechoso i detené 281 persona.

Login