Willemstad,– E dos partidonan ku ta bai forma e próksimo gobièrnu a yama un rueda di prensa ayera kaminda a splika ku den e último 4 añanan, ekonomia di Kòrsou a konosé un kontrakshon ekonómiko di 27%.  Tambe a bini dilanti ku for di aña pasá mundu ta enfrentá un krísis di salú okashoná pa e vírùs di corona, e asina yamá pandemia di COVID-19. Pa protehá humanidat, paisnan na mundu riba konseho di entre otro Organisashon Mundial di Salú a tuma vários medida, entre otro sera frontera, introdusí un toke de keda ku tur e konsekuensianan ku esaki tin pa funshonamentu di nos ekonomia i esaki a krea aún mas urgensia pa likides.

Señor Silvanie a bisa ku pa suavisá e impakto di e medidanan aki, protehá e kapasidat produktivo di nos pais i garantisá operashon di gobièrnu, gobièrnunan a rekurí na finansiamentu di programanan di reskate i estímulo ekonómiko. E ta bisa ku meskos ku práktikamente tur pais na mundu, gobièrnu di Kòrsou tambe a rekurí na finansiamentu pa suavisá e impakto di e medidanan ku nan a tuma. Pero komo nos leinan di konsenso ta obligá nos gobièrnu pa primeramente buska finansas serka gobièrnu Hulandes, gabinete Rhuggenaath a entamá kòmbersashonnan ku Hulanda pa haña ayudo finansiero pa asina nos por suavisá e impaktonan di e krísis di salú aki.

Konforme e resultadonan di elekshon di 19 di mart, pronto gabinete Pisas lo asumí responsabilidat di gobernashon i lo tin e desafio di atendé ku tur e konsekuensianan di e medidanan ku a ser tumá pa atendé ku e krísis di COVID-19.

Entre otro pa motibu di COVID-19 hopi hende no tin moda di kumpra produktonan di promé nesesidat pa nan mes i nan famia. E meta di gabinete Pisas ta pa por krea un mihó bienestar pa esnan ku a pèrdè nan trabou òf ku a haña nan mes den difikultat finansiero.

Pa por hasi esaki, gabinete Pisas tin mester di fondo kual, manera nos por komprondé, aktualmente Kòrsou no tin. Nos punto di salida ta ku nos kier e ayudo finansiero di Hulanda. Señor Silvanie a bisa ku pa e motibu aki ta dispuesto pa sigui dialogá ku Hulanda pa por yega na un akuerdo ku ta balansá.

Den e kuadro aki ta importante pa distinguí dos diferente aspekto segun Javier Silvanie.

1. Reformanan proponé – Landspakket
2. Forma di supervishon pa ku e reformanan proponé – COHO

Silvanie ta bisa ku pa kuminsá ku e promé punto, Gabinete Pisas pa un gran parti ta di akuerdo ku e reformanan den e landspakket manera e ta konosí pa un i tur. E informashon ankrá den e landspakket ta basá riba análisis i rekomendashonnan ku nos propio profeshonalnan a hasi den pasado. E reformanan tabata nesesario promé ku COVID-19 pero mas ainda awor ku nos ta meimei den e pandemia aki.

Tambe a ser trese dilanti ku riba algun punto gabinete Pisas ta di opinion ku mester bini kambio, entre otro pa motibu ku, manera sr. Knops mes a indiká, nunka no a hasi un análisis di e impakto ku e medidanan inkorporá den e landspakket por tin riba desempleo, forsa di kompra i pobresa. Tampoko no tin indikashon di e efekto ku e landspakket lo tin riba nos grandinan, hendenan ku tin limitashon físiko, hendenan ku tin un limitashon mental òf otronan den nos komunidat ku pa un òf otro motibu ta mas debil ku otronan.

“Gabinete Pisas ta un gabinete sosial di pueblo pa pueblo. Ta p’esei nos ta di opinion ku propiedatnan ku ta di pueblo, kaminda por, semper mester keda di nos pueblo”, pues señor Silvanie.