Back to Top
Responsive image
E korant di pueblo

Gabinete Rutte a kai


January 15, 2021 • 1 minüt pa lesa

DEN HAAG—Henter gabinete Rutte III a tuma retiro komo resultado di e rapòrt riba kompensashon pa mayornan.

Den e kuestion míles di mayor a keda perhudiká finansieramente pasobra servisio di Belasting inhustamente a akusá nan di froude ku kompensashon pa krèsh. Gabinete ta tuma retiro pa duna un señal ku fayonan garafal asina ta keda tuma na serio. Naturalmente ta un paso simbóliko pasobra elekshonnan ta aki dos luna. Gabinete kier a mustra ku nan tur ta karga e responsabilidat di fayonan kometé pa e servisio, segun analistanan polítiko. Ku gabinete lo kai tabata bisto for di ayera.

Partidonan di koalishon CDA, D66 i ChristenUnie a reuni diferente biaha riba e krisis. Djaweps nan a bisa ku nan ta saka konklushon. Aparentemente Rutte no kier a duna retiro na su gabinete i hasta a pidi ministernan pa garantisá sosten di nan frakshon den Tweede Kamer. Basikamente nada lo no kambia sigur pa loke ta trata maneho di bakunashon i corona. E gabinete ta bira demishonario. Djis aki ratu premier Rutte lo bai rei Willem-Alexander pa entregá retiro. Ku esaki Rutte ta evita un moshon di deskonfiansa ku lo a keda entregá awe den Tweede kamer.

Login