DEN HAAG—Gabinete ta mantene e plan pa pidi diskulpa pa pasado sklabitut dia 19 desèmber 2022, despues di konsulta na Catshuis.

Asina diferente persona ku a partisipá na e konsulta ayera entre gobièrnu i gruponan di interes. Djabièrnè gabinete ta tuma desishon definitivo den konseho di minister. Resientemente informashon a lèk ku gobièrnu hulandes tin plan pa pidi diskulpa pa pasado sklabitut. Segun e plan diferente mandatario lo pidi diskulpa via diskursonan na Hulanda i otro paisnan den reino manera Surnam i Karibe hulandes. Djis despues ku informashon a lèk, diferente gruponan di interes a ekspresá kritika fuerte, prinsipalmente pa eskoho di e fecha. Diferente organisashon ta di opinion ku e fecha mester ta 1 yüli 2023 ora ta konmemora 160 aña di abolishon di sklabitut. Algun organisashon a entama un huisio sumario. Tambe a kuestioná ku gobièrnu no a envolví e gruponan sufisiente den e plannan i ku kier manda minister Franc Weerwind Surnam pa pidi diskulpa na nòmber di Hulanda, siendo ku Weerwind mes ta desendiente di katibu. Otronan ta eksigí ku ta rei Willem-Alexander mester pidi diskulpa. Gabinete a anunsia ayera ku vise-premier Sigrid Kaag ta bai Surnam awe pa papia ku organisashonnan.

Ayera tabatin konsultanan henter dia na Catshuis entre gobièrnu i gruponan di interes. Kaag tabata dirigí e kombersashonnan pasobra Rutte no por. Kaag ta papia di kombersashonnan intensivo pero balioso. Abogado di e organisashonnan di interes Joancy Breeveld tambe tabata presente pero ta para riba ku mester kambia e fecha. Diskulpanan mester tuma lugá dia 1 yuli asina por hasi preparashonnan. Ainda no sa pa kiko presis ta pidi diskulpa. Breeveld tin intenshon di sigui ku e huisio sumario. Nan ta sinti yamá pa defende nos desensientenan. Glenn Codfried ku tambe kier forsa kambio di e fecha via hues, ta konstatá mal gobernashon. E ta spera ku gabinete ta rekonsiderá. Posiblemente gobièrnu tin pura pasobra e sosten di komunidat pa diskulpa ta baha, pero esaki no ta argumento. Kon e mayoria ta pensa di e diskulpa, no ta interesa mi segun Codfried. Un mayoria no mester tin rason, ta trata di hustisia.