Willemstad,– “Nos sa kaba ku e vírus ku ta plama mas lihé i ku e ta hasi su trabou, pues esaki ta motibu ku e konseho a bai na gobièrnu pa eskalá.

Mirando ku elekshon ta bini, no kier kita niun hende su derechi, pero p’esei bo mester ta mas atento i mester hasi e kos di un manera safe”, asina e epidemiologo Izzy Gerstenbluth a bisa.

Gerstenbluth ta bisa ku e kustumber di nos pueblo ta ku nos ta gusta bini huntu ku fiesta na sedenan, hendenan na urnanan, pero mester wak bon, paso si no tene kuenta, e evento di elekshon lo por bira un superspread event na Kòrsou i esei no tin mag, paso durante un aña largu huntu a logra tene e situashon bou di kontròl basta bon na Kòrsou, anto e ora ei no por laga kai, no por laga tur esaki tabata pòrnada i yuist den un elekshon.

E punto di salida pa nos purba frena e subida di kontagionan i asina sòru pa e elekshon ku mester sigui, sosodé na un manera mas safe posibel. Esaki tabata e motibu di e konseho.

Esaki ta motibu tambe pa un reunion ku tur lidernan. E intenshon no ta pa pone niun barera, e konseho ta di parti di e tim di salú. Laga elekshon sigui, pero laga nos sòru pa e no bira un superspread event.

Tambe e ta bisa ku ta bon ku e kampaña di vakunashon a kuminsá. Pero lo bai tuma tempu pa esaki tin su efekto den komunidat. Mester sigui vakuná, mester hasi apelashon riba tur hende pa bai vakuná. Paso ta solamente ora yega entre 70 pa 85% di vakunashon den komunidat, e ora ei nos por ta poko mas trankil i bai bèk den normal.

“Mester sigui vakuná paso nos no a yega ainda i esei ta motibu ku e medidanan aki a ser tuma”, pues dòkter Izzy Gerstenbluth.