Back to Top
Responsive image
E korant di pueblo

Gino Costina lo ta e próksimo kiper trikolor ?


May 28, 2021 • 2 minüt pa lesa

WILLEMSTAD—Tin indikashon ku kiper Gino Costina, lo por ta e próksimo kiper trikolor. Esaki despues ku ya kiper Marc van Ansem a regresá Hulanda, debí na asuntunan personal, miéntras ku ta e intenshon pa próksimamente Kevin Juliana, tambe ta riba buelo pa tera friu, relashoná ku estudio i futuro.

Esakinan mesora tabata motibu pa sali en buska di un kiper pa e ekipo, unda ku a aserká kiper Gino Costina. Ta trata aki di kiper te ku temporada tras di lomba tabata ku Centro Dominguitu, despues di a hunga tambe anteriormente pa e ekiponan di Vesta, Hubentut Fortuna i Sithoc entre otro.

Gino tabata aktivo tambe últimamente den VCVF ku e ekipo di FC Collegial, miéntras ku ta trata aki di un rèfri, kende ta dirigí den futbòl lokal. Inkluso Gino tabatin un bon desaroyo temporada tras di lomba, kual a keda koroná ku su persona dirigiendo den e gran final di e di 2 divishon di FFK. Tabata e intenshon pa e aña aki, Costina konsentrá riba arbitrahe, entre otro ku e meta pa dirigí den divishon máksimo. Sinembargo dirigentenan di futbòl lokal, no ta laga Gino ketu. Primeramente tabata esnan ligá na Inter/Willemstad i awor esnan di e trikolor di Jong Holland, ta esnan ku a bati na porta.

Miéntras tantu tabata durante di e siman aki, ku a tuma nota di presensia di Gino Costina na tereno, praktikando ku e ekipo trikolornan den nan stadion na Mundu Nobo. Esaki lo por ta indikashon, ku próksimamente tambe lo trata na yega na un akuerdo definitivo, pa por konta ku Gino Costina, komo esun pa defendé e arko trikolor próksimamente. Pues e gran pregunta, ku ainda mester haña kontesta ta, ku Gino lo bai ta parti di e aktual kampionato di futbòl FFK, den promé divishon komo rèfri, òf komo kiper di Jong Holland ?

Login