WILLEMSTAD,—Tabata ayera nochi algu pasá di 7’or, ku tabatin e último rueda di prensa, yamá pa AMAK i e organisadó di Tumba 2023.

Rignald Maduro a habri e rueda di prensa, unda ku el a pasa palabra pa presidente di AMAK, kende ta señor Manfred “Fèko” Gomes, kende a hiba palabra, kaminda ku el a pidi pa ningun hende no drenta ku alkohol ni tampoko kolonia.

Tambe el a papia rondó di e parti di seguridat ku lo bai ta mas skèrpi ku e promé tres dianan.

Despues Rignald a pasa palabra pa e presidente di hurado, kende ta señor Belli Adams, kende tambe a hiba palabra, dirigiendo su mes na entre otro esnan presente, unda a pone atenshon na diferente punto pa ku partisipantenan.

Seguidamente Rignald a yama Ludgene Balentien dilanti, kende ta esun ku ya pa algun aña ta enkargá ku e korona i mantel.

Ludgene mes a duna di konosé, ku pa su persona ta un plaser pa traha e korona i mantel pa di nuebe aña pa AMAK.

Finalmente tabata Giovanni Abath, kende a deklará lo siguiente: “Danki pa skohe arte, paso e esfuerso ku kompositornan a bin ta hasi ta balapena pa risibí e premio ku ta hiba di nòmber ‘Korona Anselmus “Boy” Dap’. Masha danki pa e oportunidat i e konfiansa”, e la finalisá bisando, komo esun responsabel pa e korona.