Harry Sargeant III, , bionario bibá na Estado di Florida, interesá na invertí den planta di asfalt na Kòrsou.

Punda—Global Management Oil Group (GOMG) a risibi un invitashon pa reuní ku maneho di Refineria Kòrsou.

Ta trata di Global Oil, GOMG (USoil Group). Ta spera e siman aki un delegashon di e kompania bini Kòrsou pa sinta ku maneho na RdK. E reunion tabata planiá pa tuma lugá ayera unda presidente di e grupo, Hatty Sargeant III, personalmente lo mester a bini Kòrsou pa hiba e kòmbersashonnan.

Ta trata di un grupo sumamente serio, ku ya tin algun luna ta mandando téknikonan Kòrsou pa averiguá i hasi un sondeo riba e posibilidat di produsí asfalt riba tereno na Refineria Isla i eksportá e materia pa merkado estado unidense. Manera Vigilante a splika for di aña pasá e grupo no ta interesá den e lago di asfalt sino ta trata di produsí derivado komo asfalt for di krudo prosedente di Venezuela. E grupo ta pensá na aktivá un parti chikí di e planta na Refineria isla unda por tin kupo di trabou di entre 150 pa 175 persona, dependé resultado di e faktibilidat. Global ta konosí pa nan komersialisashon di asfalt via di nan kompania mama, Global Oil Management Group. Tabatin  diferente rumor sirkulando riba posibilidat di produkshon di asfalt. E grupo Global, a mustra hopi interes na inisiá un planta pa prosesá asfalt i upgrading di un sekshon riba Refineria Isla pa kuminsá produsí asfalt i eksportá esaki. Pa ekonomia di Kòrsou e posibilidat aki ta unu oportuno pa krea kupo di trabou pero tambe pa yuda mantené e reserva di divisas.

Global Oil ta un kompania di renombre ku ta ópera internashonal i na Estádos Unídos, pero ku den pasado a yega di firma un kontrakt kaba na 2019 ku PDVSA  via di nan kompania yu, Erepla. Erepla LLC tabata den kontrakt ku PDVSA unda nan a komprometé pa invertí 500 mion dòler estado unidens pa “upgrading” di diferente planta pa rafiná krudo na Venezuela. E grupo tin bastante aña ta trahando ku PDVSA den un relashon ku ta lanta i kibra bek, manera entre 2006 pa 2008 tabatin un disputa di 52 mion dòler riba spesifikashon di pago.