Willemstad,– Despues ku habitantenan na Rio Magdalena for di 2018 tabata tin basta reklamo di un asil ku a establesé su mes den e bario. Awor e reklamonan lo bira ménos mirando ku GMN lo no otorgá un pèrmit pa e asil sigui operá den e área.

Ta trata di un tereno di hür kaminda Fundashon DOG a establesé su mes pa sigui ku e lucha kontra di maltrato di bestia. Atraves di tempu e fundashon tabata tin alrededor di 120 kachó ta rehabilitá, pero atraves di tempu habitantenan a kuminsá reklamá. E blafmentu kombiná ku muskita i holónan a-higiéniko tur tabata reklamonan ku e habitantenan tabata tin.

E habitantenan riba nan propio inisiativa a asta proponé diferente opshon kaminda si e asil muda, unda e asil aki lo por bai. Na Fontein tin un asil ku ta hasi meskos ku fundashon DOG i den área di playa Kenepa tambe Dierenbescherming Curaçao tin un santuario. Ámbos di e santuarionan aki ta leu for di bisiñanan, pues tin sufisiente posibilidat pa hiba e kachónan aki, segun e habitantenan na Rio Magdalena.

Dado momentu e minister a bishitá Stichting DOG kende a splika ku abase di e reklamonan di e habitantenan, nan a tuma diferente medida pa redusí e molèster, pero e medidanan no a resultá. E medidanan ta inkluí pa buta e kachónan mas patras, pero e medida aki tampoko no a resultá den bon tera serka e habitantenan di Rio Magdalena.

Na momentu ku e minister di GMN, Javier Silvania, a skucha ámbos banda e minister a splika ku lamentablemente e no por otorgá e pèrmit pa e fundashon sigui operá den e bario. E minister a indiká entre otro ku sigur e fundashon no por sigui operá den e bario mirando e reklamonan di e habitantenan. Pero e minister a splika ku e lo duna e fundashon sufisiente tempu pa muda e kachónan.