Minister Charles Cooper.

Punda—For di sèptèmber 2021, Parlamento di Kòrsou a pasa un moshon pa Gobièrnu di Kòrsou fortalesé maneho di telekomunikashon. Prinsipalmente a pone énfasis riba maneho di e.o. Blue Nap.

Siman pasa e kompania anunsiá ku awor Kòrsou tin akseso na un sentro di data sertifiká Tier-IV atraves di Blue NAP Amérika. Esaki ta un indikashon ku e moshon di parlamento na 2021, en todo kaso a kuminsá resultá den realidat. Na sèptèmber 2021, despues di un tratamentu bastante ekstenso, Parlamento di Kòrsou a yega na un moshon pa Kòrsou sigui duna konseshon pa servisionan di telekomunikashon na interesadonan konforme regulashon i manteniendo e “level of playing field”. Esaki a nifiká ku e merkado di telekomunikashon na Kòrsou, mester amplia pa laga mas kompania drenta i krea kompetensha sano. Aparte di e moshon ariba menshoná, Parlamento alabes a instruí gobièrnu pa yega na un bon servisio di internet na nivel nashonal.  Durante reunion spesífiko riba 21 di sèptèmber 2021, Charles Cooper a duna di konosé ku ainda e ta kere den e datacenter BlueNap, pero ku e maneho mester bira muchu mas agresivo.

Siman pasá, Blue Nap a anunsiá ku E nivel IV ta e stándart di mas haltu ku por alkansá pa e sentronan di data rònt mundu den e sistema di klasifikashon di Uptime Institute. E sistema di klasifikashon Tier ta determiná e grado di redundansia di un sentro di data. Mas grandi e klasifikashon ta, mas mihó e kontinuidat i e disponibilidat lo ta. E sentro di data Blue NAP Amérika a konbertí den e promé i úniko sentro di data regional pa logra un seyo di nivel IV.

Segun Cooper, ku di banda di BlueNap e ta kere den e negoshi mas tantu si nan gerensia kuminsá buska negoshi muchu mas agresivo, “nan no mester manehá riba un forma pasivo” Minister Cooper a splika.  E minister a bisa ku tin demasiado kompetensia pa BlueNap na Kòrsou i ta pa esaki nan mester kuminsá buska pa drenta e merkado internashonal. E pensamentu di  Cooper a drenta despues ku e gobièrnu anterior tabata tin plan pa likidá BlueNap.  BlueNap ta un sentro di data kual ta mas spesifikó situá riba seru di Mahuma.

E benefisionan di un sentro di data ku risibí sertifikashon Tier IV ta nifiká ku e empresanan awor lo por disfrutá di un atministrashon i operashon di klase mundial i un 100% di tempu di aktividat di tur rekursonan kritiko. E aspekto mas importante di kualkier sentro di data, pero spesialmente di un sentro di data ku sertifikashon IV ta: e suministro, e distribushon i e asuntu di energia eléktriko kritiko. Pa Kòrsou, ehekushon di un moshon for di parlamento, ta duna tòg un sosten ku e sistema demokrátiko, sa funshoná.

For di 2018 den kuadro di e SMART Nation Development a krea un struktura pa huntu traha di forma integral riba e desaroyo aki den enseñansa tambe. Gobièrnu a firma un akuerdo ku Dataplanet NV, ku su nòmber komersial, Blue NAP Americas, kaminda den e akuerdo aki a keda di bai traha riba un sentro di informashon/data pa e infrastruktura di enseñansa tambe.