Back to Top
Responsive image
E korant di pueblo

Gobièrnu benidero lo desaroyá un Plan di Rekuperashon di Kòrsou 2021 riba término korto


May 15, 2021 • 2 minüt pa lesa

Pa por dil ku e konsekuensianan di Covid-19, e Gobièrnu benidero lo desaroyá un Plan di Rekuperashon di Kòrsou 2021 (National Recovery Plan [NRP]) riba término korto.

Willemstad– Kòrsou aktualmente ta konfrontando algun reto signifikante i ku ta di vital importansia pa desaroyo di nos País. E retonan aki tin reperkushon direkto riba nos siudadanonan. Ta imperativo pa for di komienso di e periodo di Gobernashon 2021-2025 e situashon aki keda diskutí pa asina garantisá ku e akshonnan nesesario ta wòrdu tumá.

E krísis di e Pandemia di COVID-19 a inisiá na Kòrsou ora e promé infekshon a bira konosí na Kòrsou, riba 13 di mart 2020. COVID-19 a trese impaktonan grandi finansiero, ekonómiko i sosial. Aparte di esakinan, e Pandemia a pone un preshon enorme riba nos rekursonan i a konfrontá nos ku nos realidat i limitashonnan.  A parte di a pone preshon riba e sistema di salubridat, esta nos hospital i otro fasilidatnan i rekursonan, Covid-19 a afektá bida di hopi siudadano i a kosta bida di un kantidat di 118 persona riba nos isla te ku 13 di Mei 2021. Bastante ta rekursonan ku a ser utilisá pa por kombatí e Pandemia, entre otro e proseso di bakunashon pa por hisa resistensia di nos Pais. Gobièrnu di Kòrsou ta agradesido na tur partner den Reino ku a aportá i kontribuí den e proseso aki.

Pa por dil ku e konsekuensianan di Covid-19, e Gobièrnu benidero lo desaroyá un Plan di Rekuperashon di Kòrsou 2021 (National Recovery Plan [NRP]) riba término korto. E impakto di Covid-19 a kousa un krísis severo, sigur saliendo for di e punto di bista ku Kòrsou, promé ku e Pandemia ya deteriorá di un kontrakshon pa reseshon. Esaki a afektá  bida di tur siudadano di negativamente i a okashoná ku esnan mas pober i vulnerabel den komunidat a wòrdu afektá di forma mas severo. Redukshon di pobresa i distribushon di bienes a haña un sla konsiderablemente. Pues pa dil ku e realidatnan i e efektonan di e Pandemia, e gobièrnu aki ke realisá un programa di rekuperashon ku mester hasi Pais Kòrsou resiliente, sostenibel i ku mester ta basá riba ku inklushon, spesialmente teniendo kuenta ku esnan ku tin ménos rekurso i posibilidatnan.

Den e kuadro aki e gobièrnu aki lo utilisá komo base pa e NRP, e dokumento titulá “From Covid-19 Crisis Response to Resilient Recovery – Saving Lives and Livelihoods while Supporting Green, Resillient and Inclusive Development (GRID)” kual a keda prepará pa Banko Mundial, den mart 2021 pa e “Joint Ministerial Committee Meeting” entre Banko Mundial i Fondo Monetario Internashonal.

E dokumento aki ta proponé un aserkamentu integral pa promové un rekuperashon fuerte i duradero i un kresementu basa riba e konsepto GRID. Di e forma aki por realisá e transformashon sosial-ekonómiko. Esaki ta basa riba 4 pilar, esta (i) salba bida, (ii) protehá e hende pober i vulnerabel, (iii) sigurá kresementu di negoshi sostenibel i kreashon di empleo i (iv) fortifiká maneho, institushonnan i invershonnan pa mihó rekonstrukshon.

Login