Willemstad – Komo ekspreshon di gratitut i rèspèt pa bida i trabou di Papa Francisco, Gobièrnu di Kòrsou a duna instrukshon na tur organisashon i instansha di Gobièrnu pa hisa bandera riba djabièrnè 25 i djasabra 26 di aprel 2025. E instrukshon ta enserá pa hisa bandera di Kòrsou na mitar, riba e dianan menshoná, for di e momento ku solo sali te ku 6’or di atardi. 

Mas tokante Papa Francisco

Papa Francisco tabata lider di Iglesia Katóliko, Obispu di Roma i monarko soberano di suidat Vatikano, for di 13 di mart 2013 te ku su fayesimentu riba 21 di aprel 2025.
Riba djabièrnè 25 di aprel, pa mitar di 1 di mèrdia, tin un Santa Misa Requiem na Katedral di Pietermaai, pa tur fiel. Ta hiba Papa Francisco su último lugá di sosiego riba djasabra, 26 di aprel den basíliko Santa Maria Maggiore na Roma.

Instrukshon pa bandera halfstòk

Ora mester hisa bandera halfstòk, ta hisa e bandera kompletu promé. Despues ta bah’é poko poko i ku rèspèt te na mitar di e palu di bandera, pa kaba di mara e kabuya. Ora di baha e bandera, mester his’é te ariba promé ku rèspèt, pa despues bah’é na mésun manera kompletamente.