Ramond Gradus, Cft a bisa ku mester pero mester tuma medida

Punda—Hunta di Minister di Reino, a pone kondishon riba Gobièrnu di Kòrsou pa kuminsá kumpli ku stipulashon den COHO i Pakete di Pais. E kondishonnan ta afektá dirèkt entrada di miembronan di Parlamento ku 25% miéntras direktornan di Kompanianan Anónimo i Fundashonnan bou di maneho di Gobièrnu mester baha ku 12.5%. Ademas mester baha gastunan den aparato públiko tambe ku 20%.

Un reunion den Hunta di Minister di Reino a stipulá bon kla ku Kòrsou mester kumpli. Un finansiamentu aprobá di 168 mion florin ta mará na pagonan inkremental dependé kon leu Kòrsou yega ku ehekushon di medida. Te ku desèmber 2021 e nesesidat na likides ta yega 540 mion florin. Den e Pakete di Pais, kual ta a areglo supordiná di COHO Hulanda a stipulá diferente eksigensha:

Maneho Finansiero:  Un mihó kòntròl di fondonan públiko.  E fondonan ku Kòrsou ta kobrando mester wòrdu gastá responsabel. Di e manera aki por invertí mas efisiente. Evaluashon di e Maneho Finansiero a wòrdu definí den diferente sup sistema i despues di 3 luna ta evaluá. Tambe ta bai evaluá e proseso kon ta yega na kalkulashon di presupuesto i supsidionan gubernamental i kon nan ta wòrdu uza efektivo i efisiente. Na 2020 Kòrsou a kobra riba 300 mion ménos na impuesto i na 2021 lo no ta muchu diferente. Sin finansiamentu, diferente gastu presupuestá durante último mitar di 2021 no por wòrdu kanselá.  Vulnerabel ta bira 90 mion florin na kréditornan, 27 mion na retiro boluntario (VVU), 87 mion di pagonan na penshun di APC, 48 mion na pagonan AOV/BVZ, 123 mion destiná na Fondo di Sosten pa programashon di e.o. NOW ets.

Reforma Ekonómiko: Kòrsou mester mehorá klima pa hasi negoshi i desaroyá un mihó maneho  pa loke trata tereno di gobièrnu. Den kuadro di esaki lo lanta un kompania pa manehá e propiedat i tereno di gobièrnu. Ademas di esei, Hulanda a pone na disposishon e posibilidat di un Fondo di Garantia di 44 mion florin pa stimulashon di ekonomia. Den kuadro pa stimulá invershon, 18 mion riba presupuestá di likides tambe ta kore riesgo.

Enseñansa:  Gobièrnu mester evaluá e kalidat di enseñansa i wak kon pa drecha esaki. A inventarisá tambe e estado físiko di e skolnan i wak kon pa drecha. Na 2020 a aprobá sosten finansiero di Hulanda pa invertí 33 mion. Te ku final di Desèmber 2021 tin 180 mion programa pa paga na supsidionan inkluso fundashonnan i organisashonnan den enseñansa.

Kuido i Salubridat: ta pone enfoke pa frena e pandemia di Covid. Mester krea kuido médiko pagabel i yega na e medionan responsabel pa atendé ku e kuido i hasi esaki aksesibel. Cft a komprometé mas envolvimentu den maneho durante 2021 miéntras mester determiná 66 mion fiansa for di benta di UTS. Hulanda ta eksihí pa tin mas kòntròl riba maneho na CMC inkluso ehekushon di un sistema sentralisá pa kumpra remedi ku ekiponan médiko.

Efisiensia di Aparato Públiko: Mester drecha efektividat den kompanianan i servisionan gubernamental. E idea ta pa traha kualitativo i efektivo. Mester redusí gastunan di gobièrnu na 20% den e próksimo 5 aña. Pa 2021, ta planiá pa efektuá e asina yama VVU unda por lo ménos 600 ámtenar ta baha fo’i aparato.

Sistema di Impuesto: E sistema di kobransa mester bira un sistema fásil pa ehekutá i ku por garantisá stabilidat ekonómiko.  Durante Covid, kombiná ku problemanan okashoná pa kandela na Ontvanger, kabinete nobo mester buska un balansa pa organisatorio e sistema di impuesto ta funshoná mas optimal.