Gabinete Pisas 2 mester splika Parlamento ta dikon lo eliminá e rebaho riba e kondishonnan laboral di ministernan i miembronan di Parlamento promé ku tur hende.

WILLEMSTAD – Gabinete Pisas 2 mester splika Parlamento ta dikon lo eliminá e rebaho riba e kondishonnan laboral di Ministernan i miembronan di Parlamento promé ku tur hende. Frakshon di PAR a para ketu na e rapòrt di Hunta di Konseho (Raad van Advies, RvA) ku a indiká ku gobièrnu mester splika kon gobièrnu tin idea di bai ehekutá e plan aki otro aña.

Manera e hunta ta mustra, Gabinete Pisas 2 ta indiká den e Presupuesto Suplementario 2022 di tin e intenshon di eliminá e redukshon riba e pakete total di kondishonnan laboral di Ministernan i miembronan di Parlamento por kompleto entrante 1 di yüli 2023. Pa ámtenarnan i esnan di mesun rango e supreshon total lo ta entrante 1 di yanüari 2024. Pero e hunta ta preokupá ku e plannan akí di gobièrnu i a pidi gobièrnu pa splika kon ta bai hasi esaki teniendo kuenta ku e situashon finansiero di pais.

Gabinete Pisas 2 a disidí pa no kontinuá ku e intenshon original di eliminá e redukshon dje 12,5% i ta enfatisá ku no tin e intenshon di sigui ku esaki pa e aña aki mas tampoko. Sinembargo, gobièrnu a duna tur funshonario i personanan di mesun rango un pago un biaha so di 1750 florin bruto riba nan salario. Pa loke ta trata e pòst ‘Supsidionan i transferensianan’ e intenshon ta pa sigui ku un subida puntual dje supsidio di 6% pa tur e instanshanan supsidiá pa gobièrnu. “Esaki ta un kompensashon di un biaha so, debí na e oumento di kosto di bida.”

No opstante, RvA a konsehá gobièrnu pa supervisá di aserka e adaptabilidat di e konsekuensianan finansiero dje eliminashon gradual den e presupuestonan akí. I si ta nesesario kontinuá ku eliminashon adishonal te ora ku tin sirkunstansianan finansiero mas faborabel. Riba e konseho di RvA akí gobièrnu a reakshoná splikando ku e eliminashon dje deskuento salarial di 12,5%, ta solamente posibel for di aña 2023.

“Lo implementá e eliminashon (pa 2023 i mas despues) den tranches, teniendo kuenta ku e realidatnan finansiero di pais. Lo evaluá e posishon di likides di pais tur aña i lo evaluá a base di esaki si ta eksistí márgen tantu presupuestario komo tékniko di likides pa drai bèk (parsialmente) e aktual redukshonnan den e kondishonnan labora. Ku otro palabra, e eliminashon gradual ta dependé i lo tuma lugá denter di e medionan finansiero di pais.” Asina gobièrnu ta enfatisá den su splikashon dje Presupuesto suplementario 2022.

Parlamento a trata e presupuesto aki djárason último den Komishon Sentral. Durante e reunion akí, Parlamentario Steven Martina di MAN tabata ke sa prinsipalmente dikon ta papia di un oumento di 19 mion florin. Importante ta tambe segun Martina ku no ta nada straño ku pa sera e presupuesto 2022 di forma balansá lo hasi uso di sosten di likides. Segun Martina promé gobièrnu a hasi komosifuera ku lo no hasi uso di sosten di likides for di Hulanda pa sera presupuesto di forma balansá, pero ku a resultá awor ku ta esei ta e realidat.

Na final dje reunion Presidente di Parlamento di Charetti America-Francisca a konstatá ku Parlamento a bai di akuerdo pa saka un informe ku e preguntanan ku e Parlamentarionan a hasi durante di e reunion, pa gobièrnu por kontestá por eskrito.