1 yüli: Raymond Gradus ayera na Marriott. Den su karta riba 9 di yüli último Kòrsou tin te otro siman pa entrega dokumentashon riba tur debe.

Punda—Cft ke mira un rekuento di tur debe ku Kòrsou a hasi. Esaki ta un kompilashon i skema di debe i akuerdonan di fiansa inkluso nan skema di interes. Un karta di Cft, firmá pa Raymond Gradus riba 9 di yüni último dirigí na Hunta di Minister di Reino ta konfirmá esaki.

Segun Gradus, fo’i 26 di mart último Hunta di Minister di Reino a eksihí pa Kòrsou entrega e rekuento na momento nan traha nan reportahe di promé kuartal 2021. E reportahe mester ta kla 6 siman despues di final di mart, lokual ta di dos siman di Mei 2021. Pero, Kòrsou a finalisá su reportahe sin duna Hulanda informashon riba su rekuento di debenan. Den e rekuento, Hulanda tabata ke mira relato kompleto riba e posishon di debe nashonal inkluso e skema di repago kompania pa e tabla di interes. Ademas Kòrsou mester a entrega dokumentashon di tur e akuerdonan di fiansa. Lokual Kòrsou a entrega den su reportahe ta un lista di debe pero sin skema di repago i tabla di interes. Tampoko no a entrega dokumentashon. Esaki ta nifiká ku Cft, e Kolegio di Supervishon Finansiero no tin un bista riba e struktura di debe.

Raymond Gradus, den su konseho na Hunta di Minister di Reino a pone un ultimatum. Kòrsou ta haña te ku 1 di yüli, segun e karta di Gradus pa entrega tur dokumentashon riba su debenan. I dokumentashon ta nifiká un reportahe unda por mira ku eksaktitut e posishon di debe nashonal. Ayera durante un presentashon na Marriott Hotel, Gradus a atmití di no tin un bista kompleto riba e debenanan di Kòrsou. Anke e la keda sin menshoná e “deadline” di 1 yüli próksimo, e profesor dr den finansas públiko a splika esnan presente den sala ku “nan ta trahando riba dje”. Pa tal motibu no tabata posibel e por a duna un bista kiko realmente e debe nashonal di Kòrsou ta.

Lokual tin na e momentonan aki,  ta e reportahe di mart 2021. For di esaki ta konkluí, ku e debe nashonal di Kòrsou, inkluso e último aprobashon di siman pasa na 168 mion florin, por yega 4 bion florin (4 mil mion). Promé ku Covid, Kòrsou tabata debe Hulanda 2.4 bion florin. Durante 2020 a bini aserka 670 mion florin pa Fondo di Sosten mas 170 mion pa finansiá i garantisá Giro. Mester añadí aserka debenan lokal kual riba esaki no tin muchu detaye pero segun banko sentral esaki por ta kore entre 400 pa 600 mion inkluso debe na diferente “kréditor”. I manera ta konosí, tin suma di 168 mion florin aprobá pendiente si Kòrsou ta bai kumpli ku e demandanan di Hulanda.