Javier Silvania.

Punda—Segun minister di Finansas Públiko, Javier Silvania, Curaçao Medical Center (CMC) na 2023 ta den posishon pa kuminsá paga su obligashonnan sin problema. E minister a tuma su konklushon abase di lokual e la risibi na informashon serka SVB. Segun SVB, den e presupuesto di kuido, ta inkorporá e kostonan di interes di CMC.

E diskushon a bini dilanti ayera, durante e rònt di kontesta ku Silvania mester a duna. Tabata trata un pregunta riba e 9 mion di CMC ku mester a drenta i si esei no sosodé kiko ta e konsekuenshanan. E minister a splika ayera ku nan ta enfatisá ku riba manehá e riesgonan ku por tin enkuanto e trayektonan pa hasi CMC sostenibel. Si akaso e trayektonan pa hasi CMC sostenibel no logra kaba kompletu den 2023 lo evaluá ki efekto esaki por tin riba e forsa di pago di CMC. A base di e análisis aki gobièrnu lo tuma e desishonnan nesesario pa sostené kuido médiko i mantené e presupuesto di Kòrsou  balansá

CMC su défisitnan di pasado (mayoria ta gastunan ku a wòrdu pagá kaba dor di CMC òf gastunan di e hür na CMC Vastgoed) lo keda analisá pa despues tuma e desishonnan nesesario enkuanto esakinan.

Entretantu, di SVB a komprondé ku e gastunan di kapital i trabounan diario a wòrdu inkorporá den e presupuesto di kuido ku CMC ta haña di SVB. Esaki kemen ku CMC por kuminsá paga Gobièrnu meskos ku CMC a hasi na 2020 promé ku Covid. “Esaki meskos ku nan ta paga Vidanova fiel i devoto tur santu luna”, Silvania a remarka ayera den parlamento. Finalmente e la bisa tambe di ta buskando un solushon permanente pa e gastunan médiko di personanan indokumenta, gastunan di Covid i e hür eksorbitante di CMC Vastgoed.