Javier Silvania, minister di Finansa Públiko

Punda—Gobièrnu di Kòrsou ayera a anunsiá ku e programa di NOW ta bai riba un “hold” pendiente un desishon di Hulanda pa suministrá Kòrsou e siguiente “tranche di finansiamentu. Manera ta konosí, Kòrsou a súplika 187 mion florin i Cft a duna konseho pa duna 168 mion florin. Pero depósito di e plaka den Euro, lo dependé di desishon(nan) ku Parlamento di Kòrsou mester pasa.

Segun un komunikado di Gobièrnu ayera, petishonnan pa Sosten Empresarial pa luna di yüni 2021 ta dependé di e siguiente tranche di likides for di Hulanda. Esaki ta nifiká, ku ainda MEO no por duna un fecha ki dia empresarionan individual i empresanan lo por hasi petishon di TBZO i NOW pa luna di yüni 2021. Asina ku MEO tin aprobashon di Minister di Finansa, nan lo anunsiá esaki i habri e portal  di TBZO i NOW manera ta kustumber.

Pa lokual ta trata NOW, te ku desèmber 2021 tin un presupuesto di 6 mion florin mensual pa duna sosten na mantenshon di kupo di trabou i stimulashon di ekonomia. Esei ta duna un total di 42 mion florin ku ta riba un “hold” pendiente desishon di parlamento di Kòrsou pa e.o. baha nan salarionan ku 25%. Te ainda no tin klaridat si tur frakshon den parlamento ta riba mesun liña, pero segun minister di finansas Javier Silvania, den komishon sentral no tabatin opheshon pa parlamentarionan i ministernan baha nan salario. Hulanda a duna te ku 1 yüli tempu pa hasi esaki.

E pakete total di sosten presupuestá te final di 2021 ta kalkulá na kasi 170 mion florin. Ta trata di 20.5 mion di entre yüli pa desèmber 2021, miéntras pa yüni tabatin un presupuesto di 52 mion florin. Durante Yüni, gobièrnu hasta presupuestá gastunan èkstra di sosten. Esaki inkluso 9 mion florin pa Curaçao Medical Center. Tabatin dòbel presupuesto pa NOW na 6 mion florin i tambe pa TVL, kompensashon pa kostonan fiho.

Segun Silvania, aktual gobièrnu tin un tim nobo pa atendé ku introdukshon di COHO. E tim nobo tin 2 luna ta reuniendo riba e puntonan di konflikto. Den e kuadro aki, un kombersashon ku Raymond Knops di Hulanda, ta konkluí ku Hulanda ke formalisá e akuerdonan. Segun Silvania, parlamento mester ratifiká e akuerdonan entre Hulanda i Kòrsou sino no ta bini finansiamentu. Silvania a sigui enfatisá ku Kòrsou tin problema ku ta 3 funshonario ulandes oropeo ta kontrolá ehekushon di COHO i tin deseo pa inkorporá un yu di Kòrsou den maneho i kòntròl di COHO. Ta e intenshon pa dividí e sosten di 168 mion den dos pago, unu di 75.5 mion florin i un di dos 93.5 mion florin. Pero na e momentunan aki, sin desishon di parlamento no tin niun fiansa mas for di Hulanda.