AMSTERDAM—E grado di bakunashon bou di muchanan for di 9 aña a baha atrobe den 2023 kompará ku 2022.

Esaki segun e relato anual di Instituto di Salubridat RIVM. Tantu RIVM komo sekretario estado demishonario Van Ooijen di Salubridat ta haña e bahada preokupante. E porsentahe di muchanan den katergoria edat ku bakunashonnan a baha di 81,1 pa 78,2%. Si den 2022 81,2% tabatin bakunashon, e porsentahe a baha den 2023 na 78,5%. Un splikashon RIVM no ta duna, e instituto ta bisa den e relato ku mester hasi mas investigashon riba e kousa dje bahada. Di e kuater siudatnan mas grandi Rotterdam tin e grado di bakunashon mas abou.

Kaminda riba nivel nashonal tin 83,1% di muchanan ku tin tur bakunashon básiko, den Rotterdam e ta 74,6%. E porsentahe bou di muchanan di skol ta ménos. Den 2023 RIVM a bati alarma pasobra e grado di bakunashon bou di beibinan i muchanan te 2 aña, den 2022 pa promé biaha den un desena e porsentahe a baha bou di 90%. E porsentahe a keda igual den 2023. Pa e bakunashon di BMR i otro bakunashonnan esaki a subi serka beibeinan. RIVM i sekretario estado ta haña esaki un desaroyo positivo. Tòg nan ta enfatisá ku e porsentahe di bakunashonnan bou di muchanan ainda mester di atenshon. Un grado di bakunashon haltu ta importante pa proteha muchanan kontra malesanan grave i pa evita brote di e malesanan, segun RIVM. E organisashon di salubridat mundial ta konseha un grado di bakunashon di 90%. RIVM ta mantene pa Hulanda un asina yama grado di bakunashon di minimo 95%. Den un sondeo ku RIVM a hasi zomer 2023 ta indiká ku mayornan di muchanan 9-13 aña ta mas positivo riba bakunashon ku den 2022. E persepshon ku mayornan di muchanan bou di 3,5 aña tin di bakunashon no a kambia. Mayoria mayornan ainda ta positivo riba bakunashon, segun RIVM. E grado di bakunashon ta bahando pa alguun aña kaba. RIVM ta papia entre otro di e pandemia di corona i e oumento di resistensia kontra gobièrnu komo posibel motibu. Banda di esei media social tambe ta hunga un ròl. Mayornan ku tabata duda kaba riba bakunashon por mira online videonan di hendenan ku ta bisa ku bakunashon ta dañino. Sekretario estado Van Ooijen a bisa den aprel den Tweede Kamer ku e programa di bakunashon atraves di añanan a skapa míles di bida i ku lo e hasi tur kos pa subi e grado di bakunashon.