Back to Top
Vigilante banner image

Grupo YDK i Venezolano aktivo den planifikashon di sekuestro


April 9, 2022 • 1 minüt pa lesa

Anoerish Ghisiawan mester bolbe bai será pa warda tratamentu di su kaso

Nieuwe Haven, — Ayera e 5 akusadonan, Edgar Batista Sanchez, Gordie Sambo, Felix Garcia Zavala, Anoerish Ghisiawan i Maickol Rafael Contreras a presentá dilanti korte di promé instansha pa tratamentu di nan kaso den su kontenido.

Pero e kaso aki no a kontinuá pa motibu ku fiskal mr E.Bos tabatin kebrante di salú i no por a hasi akto di presensia. E echo aki no a kai den masha bon tera serka e akusadonan i nan abogadonan. Den gran parti nan no tabata ke pa e kaso keda posponé paso segun nan, ta basta dia nan tin será pornada kaba. Despues di a evaluá e situashon, wes mr. Snitker a disidí di posponé e kaso tòg te 25 di aprel próksimo.

E grupo aki ta keda akusá ku durante e periodo di 1 di òktober pa 7 di òktober lo mester a hasi nan mes kulpabel na varios delito manera entre otro intento (preparashon) di sekuestro, preparashon pa atrako, ekstorshon i posishon di arma di kandela. Pa ku e investigashon aki, riba 20 di òktober 2021, polisnan a hasi entrada hudisial na 5 adrès kaminda nan a konfiská diferente telefon.

Pa loke ta trata e akusado Ghisiawan, despues ku wes a skòrs su detenshon dia 3 di mart último, ayera wes a bisé ku e lo mester bolbe bai será pa warda tratamentu di su kaso. Wes mr. Snitker a splika e akusado ku ya e motibunan ku el a skòrs su detenshon pe, ei dia ei, no ta vigente mas. Pues a bisé meskos ku tur e otro akusadonan, e mester bai sinta warda tratamentu di su kaso den prizon.

Login