Tabata dia 5 di yuli 2024  ku a kuminsá ku detenshon di e sospechosonan.

Willemstad— Aparte di 9 atrako arma gran parti di e grupo di 6 aki ta wòrdu akusá tambe di a kometé ladronisia di vehíkulo i a bai skonde esakinan den mondi na Bullenbaai pa usa nan ora nan tin mester di esakinan. 

Ayera 6 sospechoso mester a presentá den korte akusá di a partisipá den vários kaso di atrako. Primeramente e dama Mirecy Windster (1997) no kier  bin korte pa tratamentu di su kaso. Esaki a pone ku Fiskal mester a hasi un sugerensia na Hues pa laga  trese e akusado den korte pa e sigui su tratamentu ya ku e la haña su sitashon na tempu pa e ta na altura ku ayera su kaso lo bai wòrdu trata.

Despues ku Hues a studia e petishon di Fiskal, hues a haña ku ta na su lugá ku Mirecy mester ta presente den korte i a laga traha un mandato pa Mirecy wòrdu trese kual a tuma lugá mesora. Mirecy a splika ku e no kier bin korte ya kue ta basta rabia i alabes tristu ya ku e ta haña ku e ta sera pòrnada i ta akusá di yen kos ku e no a hasi. Fiskal a mustra ku aki ta trata di 5 hòmber i un dama ku ta wòrdu akusá di a partisipá den no ménos ku 8 atrako i tambe un ladronisia di vehíkulo.

Tur esaki a pasa den un periodo di dos siman for di 22 di yüni pa 5 di yüli.  E sinku akusadonan maskulino ta Rayshently Comenencia  ( 2003) alias Mangala, Chendell Mercelina (1974) alias Zumbi ku no tabata presente ya ku e la wòrdu pone den libertat debí ku durante ku e tabata detené a lubidá di alargá su detenshon, Shantony Servanie ( 2004) alias Shanto, Robert Garcia (2002) alias Red i  Labon Miller (2006).  Fiskal a mustra ku ta trata di atrako riba establesimentu di chines, un toko,  un bendedó di bièchi i tambe un bendedó di number.

E promé atrako ta dia 22 yüni ku ta un atrako riba un toko na Veeris sigui pa atrako riba bendedó di bièchi dia 25 di yüni 2024, 26 di yüni atrako riba bendedó di number den Cyprusweg, 27 yüni atrako riba Toko  Minimarket Nos logro, 28 yüni atrako den Souax, atrako Convenience store na Moontjeweg dia 29 di yüni 2024, atrako Juan Hatoweg dia 5 di yüli 2024 i atrako un biaha mas Toko Minimarket Nos Logro dia 5 di yüli 2024 na Klein St Michiel.  Tabata despues di e último atrako ku tabata e dia 5 di yüli 2024 ku e tim di atrako ku ya tabatin algun di e sospechosonan di tap a kuminsá detené e atrakadónan.

Ayera tur e akusadonan aki a wòrdu representá nan respektivo abogadonan.