Aspirantnan di klas BPO 2019-I despues ku nan a kaba di huramentá huntu ku minister di hustisia sr. Gilmar Pisas

Willemstad—-Den luna di sèptèmber 2021 klas Basis Politie Opleiding (BPO 2019-I) di Opleidingsinstituut Rechtshandhaving & Veiligheidszorg (ORV) lo bai den práktika i start ku e asina yamá ‘Beroep Praktijk Vorming’ (BPV) na Kuerpo Polisial Kòrsou.

Djaluna 30 di ougùstùs 2021, e klas di Basis Politie Opleiding (BPO 2019-I) ariba menshoná a huramentá serka Minister di Hustisia sr. Gilmar Pisas. E huramentashon a tuma lugá riba e plenchi  di Departamentu di Hustisia. Despues ku funshonario di Departamentu di Hustisia sra. Jennifer Hypolite a lesa e teksto di huramentashon i promesa (eed en belofte formule), Minister di Hustisia sr. Gilmar Pisas a huramentá e klas durante un seremonia.

 Despues di a kaba periodo 4 i 5 di Basis Politie Opleiding, aspirantnan den formashon ta bai práktika pa 8 siman. Despues di e 8 simannan aki, ta evaluá e periodo di práktika aki, pa despues nan pasa nan último BPV (praktika) di 26 siman. E aspirantnan lo ta bou di guia di mèntòrnan di Kuerpo Polisial Kòrsou ku a sigi Kurso di Mèntòr na ORV resientemente. Dor di siña den práktika e aspirant ta sera konosí i haña e konfiansa ku e mester pa e organisashon polisial (KPC). E aspirant ta haña mas bista di e trabou i e ta desaroyá e kompetensianan pa traha. Tambe e aspirant ta haña e bista real di e funshonamentu na KPC pa mira su funshonamentu den e kuerpo den futuro. Den e periodo di 8 siman e aspirantnan lo pasa práktika den trafiko i despues e praktika di 26 siman, e parti di asistensia, mantenshon di orden públiko i investigashon.