Back to Top
Vigilante banner image

Grupo G pa mundial di futbòl Qatar 2022


November 23, 2022 • 3 minüt pa lesa

Neymar, kende ta e gran speransa di selekshon Brazil.

WILLEMSTAD—Finalmente Deporte Vigilante a logra yega Grupo G di e kampionato mundial di futbòl Qatar 2022, ku nos fiel lektornan. Esaki despues di a duna bo informashon di tur e demas gruponan promé i awor falta grupo H, kual nos lo kompartí den e edishon di mañan. Tur esakinan kompartiendo for di Buki Mundial 2022.

BRAZIL

Selekshon di Brazil a alkansa nan di 22 kampionato mundial, unda ku nan 5 okashon nan a logra pa gana e titulo maksimo.

Brasil ku tin hopi fanátiko na Kòrsou i rònt mundu. Nan ta e úniko selekshon ku tur mundial ta wòrdu konsiderá un di e gran faboritonan. Esei no ta pòrnada, paso nan ta e selekshon mas eksitoso den historia di Kopa di Mundu, bayendo kas ku e korona na anjanan 1958, 1962, 1970, 1994 i 2002.

Brasil ta e úniko pais ku a hunga den tur mundial i e úniko ekipo nashonal ku a gana e kopa riba kuater diferente kontinente, Oropa/Suesia ’58, Sur Amérika/Chile ’62, Nort Amérika/México ’70 i Merka ’94 i Asia/Korea/Hapon 2002.

E selekshon ku awor ta bou di mando di Adenor Bacchi, konosí komo ‘Tite’ atrobe a bai mundial ku un selekshon ku por kana e kaminda kompletu pa oro.

E atake di Brasil ta mustra berdaderamente mortal. Esaki basta, Neymar (Paris Saint-Germain), laga su aktonan di sirko keda kas na e mundial aki. Neymar i e otro super strea ku ta biniendo Vinícius Júnior (Real Madrid) tur dos su puesto preferí ta ataka for di riba ala robes, pero den e kaso aki Vinícuis Jr lo move pa ala drechi i nan lo kambia durante wega.

KAMERUN

E‘leonnan indominabel’ no por ni gruña den e grupo aki, unda kiu nan ta di 8 biaha den un kampionato mundial. Na anja 1990 nan a logra alkansa kuartfinal, komo nan miho logro.

Esnan di mas edat ta kòrda ainda dia e pais di Afrika Sentral a bira e promé selekshon afrikano pa yega kuartfinal den un kampionato di mundu. Tabata na  Italia ’90. Ken di e generashon mas grandi no ta kòrda e gol di Françios Oman Biyik, dia Kamerun a shòk mundu futbolístiko ku un viktoria di 1-0 riba e kampion mundial di e momentu ei Argentina.

Òf e dos golnan di e veterano di 38 aña, Roger Mila den tempu èkstra pa gana Colombia 2-1, kaminda e la selebrá kada gol ku un baila ku paso pekuliar. Kamerun a marka historia i a trese alegria den hinter e kontinente afrikano i hasta na tur parti di mundu.

No ta probabel ku e selekshon aktual lo por imitá e hazaña ei na Qatar. E ekipo falta nivel i kalidat. E selekshon ta bin bou di mando di Rigobert Song. E selekshon mes aktualmente no tin hungadó di e nivel di Song i Eto’o. Den gol nan tin un bon portero, André Onana ku a bai Inter Milan despues di un tempu ku Ajax di Amsterdam. E tin bon reakshon i ta fuerte.

Kiper di Kamerun, Andre Onana.

SERBIA

Serbia lo kompeti den nan di 3 mundila, unda ku na e 2 okashonnan anterior, nan no a logra pasa e fase di grupo.

E historia futbolístiko meskos ku esun polítiko di e pais den Balkan aki, ta poko kompliká. Despues ku Yugoslavia a spat for di otro na kuminsamentu di añanan 90, Serbia i Montenegro futbolistikamente a wòrdu inkorporá den un Yugoslavia nobo. Debí na sanshon internashonal  komo resultado di guera, e selekshon aki a wòrdu prohibí pa partisipá na torneonan internashonal entre otro na mundial 1994.

E ekipo a partisipá pa lastu biaha na mundial 1998. Serbia mas despues entre 2003 pa 2006 a partisipá internashonal bou di e nòmber Serbia i Montenegro. Pero despues ku na 2006 den un referèndem Montenegro a deklará su mes independiente, Serbia a lanta su mes federashon. Serbia ta wòrdu konsiderá e susesor di e selekshonnan ariba menshoná. Serbia ku a bai mundial na 2010 i 2018 i tabata na anja 2010 ku nan a sorprendé mundu, ganando e alemannan 1-0.

Dusan Tadic, kende ta kapitan di e selekshon di Serbia.

SUISA

E selekshon di Suisa a logra yega nan di 12 mundial, unda ku durante di nan trayelktoria, nan a alkansa kuartfinal, komo e posishon mas haltu, na 3 okashon.

Pa un pais ku di baina tin terenonan plat pa e muchanan hunga bala, e selekshon aki último tempu a produsí vários bon futbolista. A base di un generashon talentoso e pais di e serunan di Alpen a bira un kliente regular di torneonan grandi. Den 2017 nan U-17 a sali kampion mundial. Dos aña despues nan U-21 a pèrdè final ku Spaña.

Den e grupo aki nan tin posibilidat aunke ku e lucha pa e dos lugá ku Serbia lo no ta fásil, pero nan a yega di demostrá poder kaba manera aña pasa ora na finalnan Europeo nan gana Fransia na pinalti den oktavo final, pa den kuart final tabla ku Spaña pa despues pèrdè na pinalti. 

Granit Zhaka kapitan di Suisa.
Login