Gwendell Mercelina Jr. a indiká ku tur e gastunan di biahe ta wòrdu pagá dor di su mes persona.

Punda,– E parlamentario i miembro di frakshon PNP, Gwendell Mercelina Jr, aktualmente ta na Antigua pa partispá na e konferensha internashonal di islanan den desaroyo(SDS-4).

E evento ta keda organisá dor di Nashon Uní i pa e di kuater aniversario e evento ta tumando lugá riba e islanan Antigua & Berbuda. Ya ta konosí ku islanan chikí den desaroyo tin algun reto grandi ku mester surpasá, kual ta inkluí kambio di klima, efektonan ekonómiko i efektonan sosial despues di Covid-19. Otro retonan ta inkluí krísis riba debe nashonal kaminda un lockdown adishonal lo ta devastador pa tur isla ku ta dependé por gran parti di turismo.

Segun informashon, awe parlamentario Gwendell Mercelina Jr, lo tene un presentashon tokante “The Parliamentary Observatory on Climate Change and Just Transition (OPCC)”. E organisashon OPCC tin e meta pa promové legislashon teniendo kuenta ku kambio di klima i medioambiente den e region karibense. Sinembargo e inisiativa ta bini for di rekonosementu di e ròl krusial pa koperashon, kolaborá i solidaridat bou di parlamentarionan den e region.

Na aprel e parlamentario a bishitá Perú pa un evento similar kaminda e enfoke tambe tabata riba kambio di klima. Den pasasdo Mercelina a splika ku parlamentarionan tin un ròl fundamental den aspektonan di kambio di klima. Dor di union entre e parlamentarionan por fungi komo un ehèmpel pa e sostenibilidat di medio ambiente. Lokual ta trata implementashon di pólisa na Kòrsou, Mercelina a duna di konosé  ku Kòrsou, un isla chikitu den desaroyo , por fungi komo un posishon stratégiko importante riba e tópiko aki di kambio di klima. Mercelina a bisa tambe ku e kombersashon aki ta di importansia tambe pa Kòrsou komo un di e ‘Oversea Countries and Territories’ di Union Oropeo.

Aunke e efektonan di kambio di klima ta tuma lugá riba un forma demasiado lento, ya kaba sientífikonan a kuminsá diskubrí ku e efektonan por kousa problema sigur riba e islanan den Karibe. Na Kòrsou ya kaba por nota kon dosentenan den klas a kuminsá reklamá e kalor imenso ku nan mester traha aden den lunanan di Sèptèmber i Òktober i mas aleu, boluntarionan ku ta promové bida di turtuga a splika ku awanan na Klein Kòrsou ta yegando muchu serka di e nèshinan di turtuga.